#زوجة_شريرة_بقلم_مريم_اليوسف
#كاااملة
قبل عشر سنين
ماجد : ماما بدي اتزوج
ام ماجد : في وحدة ببالك ولا نقيلك انا وحدة عزوقي
ماجد : اي في بدي منار بنت ابو اسعد
ام ماجد : اعوذ بلله .. مالقيت غير هي لك هي امها قوية وهية قوية لا لا
ماجد : ليش ماما والله البنت حلوة ....وكمان شو قواها
ام ماجد : يا ابني انت مابتعرف شي .. لاقي غيرا الله يخليك
ماجد : طيب شوفي وحدة على زوقك وانا جاهز
......................ّ................
الآن (بعد عشر سنين)
ماجد عم يشتغل بمحل اعلاف للحيوانات... خلص شغل وراح على بيتو .. فات على غرفة فيها تختين كل واحد بزاوية الاول عليه امو والتاني ابوه
امو مقعدة بسبب تقدمها بالعمر ورجليها معد حملوها وابو معو شلل بالمنتصف السفلي من جسمو كمان مقعد .. قرب ماجد باس ايد امو وايد ابوه وصارو يترضو عليه
ماجد : كيفون الحناين اليوم
ام ماجد : بخير يا امي الحمد لله
ماجد : الحمد لله وانت يابي
ابو ماجد : بخير الله يرضا عليك وعلى اختك يارب
ماجد : الله يسمع منك .. شو راحت الهام على بيتا
ام ماجد : اي والله الله يعطيها العافية طبختلنا ونضفت البيت وساعدتني طلعتني ع الحمام وغيرت لابوك
ماجد : الله يعطيها العافية يارب
الاب والام : اآمين
ام ماجد : حبيبي لايمت بدك تضل هيك بلا مرى وبلا ولاد
ماجد : ماما والله ما الي عين روح اطلب حدا بتعرفي انو الفقر طامرنا وكمان بعد ماطلقت ربى لانو كانت تعذبكن وتهينكن معد بدي جيب حدا يصير يتمقطع فيكن
ام ماجد : بس الا ماتلاقي وحدة ادمية وبنت حلال وترضا فيك
ماجد:خايف تتكرر نفس القصة ياماما
ام ماجد : لا حبيبي نحنا مارح نسكت واذا طلعت مانها منيحة دغري رح نخبرك
ماجد :طيب ماشي رح ارجع دور .. ولاقي بنت الحلال يلي تقبل فيني
ام ماجد : ان شاء الله بفرح فيك ياعمري وشوف ولادك
تركها ماجد وراح على غرفتو .. وصار يغير تيابو وهو مهموم معقول في وحدة تقبل فيه بعد ماصار عمرو ٣٥ ومطلق وابوه وامو عندو .. مين هي البنت يلي بدا تقبل فيه ..
تاني يوم راح على شغلو بعد ما اطمن على اهلو واخد الرضا وراح
وصار يشتغل وهو حامل هموم الدنيا فوق راسو
قرب منو رفيقو لؤي وقلو :شبك ماجد
ماجد : تركها ع الله يازلمة
لؤي : خير شبك
ماجد : يعني لايمت بدي ضل هيك ولا ولد ولا تلد
لؤي : طول بالك يازلمة الا الله مايفرجا
ماجد : ايمت يازلمة ايمت رح نختير وانا لسه ماسار عندي ولد افرح فيه
لؤي : لا تقنطو من رحمة الله
ماجد : والنعم بالله
لؤي : قلي انت مشكلتك الجازة يعني
ماجد : اي حابب افرح بأبن الي وكمان بدي وحدة تقوم بأمي وابي والله اختي الله يساعدا ماعم تلحق لاعبيتا ولا عنا
لؤي : طيب شو رأيك بمنار بنت ابو اسعد
ماجد : لا لا دخيلك هي قوية
لؤي : الله لايسامح يلي طلع عنا هالاشاعة مشان هيك لهلأ ماتزوجت البنت ياحرام
ماجد : ليش انت من وين بتعرفا
لؤي : رفيقة مرتي والله البنت محترمة وفهمانة وحلوة
ماجد : لكن ليش كل العالم بتقول عنها قوية
لؤي : لانو الناس بحبو الحكي بطعمة وبلا طعمة انا قاعد معها للبنت اكتر من مرة من كتر مانا راكزة وفهمانة بترتاح معا بالحكي .. والله لو ما اتزوجت ماباخد غيرا
ماجد : انا من زمان قلتلا لامي تخطبلي اياها ورفضت قال قوية
لؤي : الله يصلحا امك لونو وافقت يمكن هلأ كان عندك منها ولاد
ماجد : يعني مانا قوية
لؤي : بصراحة هية من النوع يلي مابتسكت عن حقا بس انو قوية وقت اللزوم
ماجد : قولتك بتقبل فيني
لؤي : ليش لحتى ماتقبل فيك كمان هية صار عمرا ٣٠سنة ولهلا محدا دق بابون من ورا كلمة هي قوية مابدنا اياها
ماجد : وامي وابي بركي ماقبلت تحملون
لؤي : انت بتفتح معا الموضوع قبل مايصير شي وتقلا امي وابي بدك تحمليهن وتقومي فيهن
ماجد: وكيف بدي اعرف رأيا بالاول
لؤي: خلص اترك الشغلة علي انا بفهم مرتي تفتح معا الموضوع وتفهما وضعك وكلشي عنك .. شو رأيك
ماجد : اتكل ع الله
لؤي: لكن يلا افردا وقوم وقول يارب
ماجد : يارب
خلص شغل ماجد ورجع ع البيت كالعادة سلم ع امو وابوه وفات اخد دش .. راح لعند ابوه وامو لقاهن نايمين غاطهن منيح وطلع قعد بأرض الدار عمل نفس اركيلة وعمل ابريق شاي قعد وصفن معقول تقبل فيه ..
ماجد : الله يصلحك يا امي .. والله من عشر سنين كنت معجب فيها وخارطة مشطي بس انتي سكرتيها بوجهي وقلتيلي قوية .. معقول قوية ؟؟ لك شبك ماجد انت رجال
...............
تاني يوم
قاعدة مرت لؤي نسرين ومنار مع بعض
منار :خير شوفي ليش بعتي وراي وجبتيني كرفتة
نسرين : دبرتلك عريس
منار : عرريسس؟؟ والي
نسرين : اي الك
منار : بعد هالعمر وعريس الي اكيد ارمل او مطلق وعندو عر ولاد ماهيك
نسرين : هيك شي
منار : حظي وبعرفو .. خلص قوليلو ماني موافقة .
نسرين : طيب خليني قلك مين هو العريس
منار : هههه طيب مين
نسرين : ماجد
منار : ماجد .. ماجد ماغيرو
نسرين اي ماجد ماغيرو
منار : ماجد ماني مصدقة .. وكيف لحتى شافني
نسرين : بصراحة لؤي قلو عنك
منار : يعني لو ما لؤي قلو عني هو مانو شايفني كل هالسنين وانا قدامو وماشافني غير لما لؤي قلو
نسرين : انتي عاملة حالك عنتر ومحدا مسترجي يقرب منك
منار : هلأ انا عنتر الله يسامحك
نسرين : هلأ شوو
منار : معقول ماجد وماوافق. وانا كل هالسنين عايشة على حبو وعلى امل نظرة منو
نسرين : بس لاتنسي ابوه وامو قاعدين بالارض واكيد بدك تشتغلي فيهن
منار : اي بشيلو وبشيل كل عيلتو .. المهم كون قريبة منو واتصبح واتمسى فيه كل يوم
نسرين : كل هالقد بتحبيه
منار صفت وقالت : مابس بحبو .. انا بموت فيه من زمان وانا متمناي كون مرتو بس هو ما اتطلع علي وراح اتزوج ربى
نسرين : بس شكلو رح يكون من نصيبك
منار : امين .. اماني دعيلي .. وخبري لؤي يخبرو فورا انو موافقة بركي غير رأيو
نسرين : هلأ بتصل فيه وبخبرو
منار : اي اي الله يوفقك .. وانارايحة فرح قلب امي
..................
ماجد شارد في عندو خوف جواني انو معقول تقبل او ماتقبل .. قوية لأ ماقوية
وهو عم يحمل اكياس العلف ع سيارة .. اجا لؤي وقلو ماجد هات البشارة
ماجد : خير
لؤي : البنت وافقت وموافقة انها تقوم بأهلك
ماجد بفرح : عم تحكي جد
لؤي : اي والله جد
ماجد : لكن انا رح خبر اختي تروح تشوفا
لؤي : ماشي الله يوفقك ياماجد ونفرح فيك
...........................
المسا فايت ماجد فرحان وكمل ع غرفة اهلو وخبرون انو بدو يطلب منار
ام ماجد شهقت : هييء. ومالقيت غير هي لك هاي قوية يا امي
ماجد : ماما مافي حدا رح يقبل فيني غيرا
ام ماجد :بالناقص منا ومن غيرا .. برضاي عليك بلالك اياها
ماجد : ماما البنت مانها لاقوية ولا شي .. العالم بتحكي كتير
ام ماجد : لك انا بعيني شفتا بالسوق عم تضرب واحد لانو سرقلا الشنتة
ماجد انصدم : عم تحكي جد
ام ماجد : اي والله جد
ماجد : بس انا بعتت خبر انو رح اعملون زيارة والبنت موافقة
ام ماجد : الله يصلحك الله يصلحك ليش عملت هالعملة
ماجد : المشكلة معد فيني اتراجع
ابو ماجد : خلص اتركها ع التيسير .. اذا الها نصيب بدك تاخدا غصب عن العالم كلا
طلع ماجد وهو حيران معقول غلط
ام ماجد : ياحسرتي عليك يا ابني
ابو ماجد : شو بدنا نعمل اذا طلعت متل ربى
ام ماجد : لا مارح نسمحلا رح نتغدا فيها قبل ماتتعشى فينا
ابو ماجد : كيف ؟؟
ام ماجد : اذا تزوجا ماجد بقلك شو رح نعمل
تاني يوم راحت اختو لماجد حكت مع امها لمنار واتفقو على موعد يجو الرجال .. وبلشت تمر الايام وتمت الخطبة وعم يجهزو للعرس منار كانت تجهز من مصاريها وماكنت تصرف من مصاري ماجد لانو بتعرف وضعو .. وطول فترة الخطبة قعد ماجد ومنار مرتين مع بعض .. وكان ماجد يكون خجلان كتير او يمكن متندم ومايحكو ..
ماجد عم يشتري غراض من السوبرماركت قبل ما يروح ع البيت شافتو جارتن
الجارة : كيفك ابني ماجد شو اخبار اهلك
ماجد : الحمد لله كلنا بخير
الجارة : خبرت انك عم تجهز لعرسك
ماجد : اي والله عقبال ولادك
الجارة : تسلم يارب .. ومين خطبت
ماجد : منار بنت ابو اسعد
الجارة : يووه ومالقيت غير هي .
ماجد : خير خالة شبها منار
الجارة : لا البنت عسلامتا بس والله قوية .. الله يساعدك كيف بدك تعيش معا
وقف ماجد وهو صافن والجارة تركتو مشت .. بعد شوي فاق على حالو وراح حاسب وراح ع البيت حط الغراض بالمطبخ وقعد بغرفتو وصار بتطلع ع المحبس وصار يلعب فيه
ماجد: افسخ الخطبة ؟؟...من اولا ولا من اخرا .. طيب اذا سألوني شوبدي قلون السبب .. شو انا ولد بطلب البنت وبدي اتراجع ... خلص رح اتكل ع الله وكمل والله يستر
تاني يوم تكرر معو نفس الموقف وهو بالشغل .. اجا واحد من عندون من الضيعة عم ياخد علف لبقراتو
ابو علاء : شو ياماجد قال خاطب وبدك تتزوج عن قريب
ماجد : اي والله ياعم عقبال الي عندك
ابو علاء : لك يا ابني مالقيت غير هالبنت .. والله لتعوفك حالك بكرا
ماجد: نصيب ياعم نصيب وتركو مشي
اتضحك ابو علاء وقال : والله بكرا تصبحو بقتلة وتمسيه بقتلة ههههههه
بس ماجد سمعو
راح قعد وهو مهموم وعم يفكر انو خلص بدو يفسخ الخطبة .. اجا لعندو لؤي
لؤي: لك وينك قوم عنا سيارة كبيرة بدنا انزلا
ماجد : جاي جاي
لؤي : لك شبك يازلمة
ماجد : انا خلص قررت انو افسخ الخطبة
لؤي : ليش ؟؟ شو صار ؟ منار ماعاجبتك
ماجد : اي ماعاجبتني ماضل حدا بالضيعة الا وقال انو هية قوية
لؤي : ياحيف ع هيك زلم بتسمع لكلام الناس .. وكمان حتى لو هية قوية شو انت مانك زلمة .. ولا لتكون خايف منها
ماجد : اااه شو خايف ماخايف
لؤي : هههه اي قوم قوم وحاجتك ولدنة وضل عند كلمتك بنات الناس مو لعبة بأيدك
.........................
المسا
منار قاعدة وفاردة الجهازا قداما وعم تتفرج عليه وهية طايرة من الفرح
منار : واخيرا .. واخيرا بعد كل هالصبر الله رح يعوصني واتزوج الشب يلي بحبو الف حمد وشكر الك يارب .. والله لخليه يحبني ويموت فيني .. وشيل اهلو فوق راسي ... يلا بكسب فيهم حسنة خطي
..........................
بعد ايام صار العرس وحضر العرس كل اهل الضيعة .. وكانت منار كتير حلوة ..بس ماجد كان مخطوف لونو ومايحكي كأنو خايف او متندم .. وكل شوي يتطلع على منار بطرف عينو .. كانت حلوة وعاجبتو بس خايف انو يكون تحت هالقناع وجه شرير .. خلص الحفلة والعرسان راحو على بيتون
فاتو من باب الدار .. كانت منار خجلانة وحاطة راسا بالارض .. او عاملة حالا خجلانة قدامو بس هية جواتا كتير فرحانة ..
ماجد حاول يفرض شخصيتو وقال : تعالي ناخد الرضا من اهلي
منار : 😏 هه حاضر .. وبقلبا يعني عاملي حالك مرضي
فاتو لعند اهلون وهنن كل واحد على تخت
ماجد : يلا الله يرضا عليكي يامرى فوتي بوسي اديهين
منار بقبلا : اي لاتشد كتير انتبه لايطقلك شي عرق هههه
منار : حاضر ابن عمي
قربت من حماتا وباست ايدا وقالت : ارضي عنا مرت عمو
ام ماجد من دون نفس : ايه الله يرضا عليكي وعلىماجد
قامت منار وراحت من ابوه كمان باستو من ايدو وطلبت الرضا
ابو ماجد : الله يرضا عليكن ويوفقكن
قامت منار ووقفت على جنب ..قرب ماجد باس ايد امو وابوه وباركولو
ام ماجد : الله بهنيك ياحبيبي
ابو ماجد : يلا ابني خود عروستك ورح على غرفتك
ماجد : يلا تصبحو على خير
طلعو راحو على غرفتون وتسكر عليهن الباب ... وقفت منار بنص الغرفة ومنزلة راسا وعأساس خجلانة وناطرة ماجد ليبادر
قرب ماجد وهو خجلان ومتوتر وكأنو هو العروس او كأنو اول مرة بيتزوج .. رفعلا الطرحة عن وجها
ماجد: مبروك ياعروس
منار : الله يبارك فيك ويديمك فوق راسي
رجع خطوتين ماجد خطوتين لورا وهو متوتر وقال انتي غيري وارتاحي انا طالع ع ارض الدار شم شوية هوا
طلع لبرا وهية واقفة مصدومة وقالت : شو يعني هون مافي هوا ..
هو فات ع الحمام وطلع بعد شوي
ماجد : شبني شو صرلي .. العما معقول يلي عم يصير فيني .. شو بدي قلا او شو بدي اشرحلا .. العما من اول ليلة بدي انزل من عينا .. طيب شو اعمل .. احسن الشي اتحجج بشي شغلة واطلع من البيت فورا
رجع دق الباب وفات وهية كانت مغيرة الفستان ولابسة قميص نوم وناطرتو
ماجد : منار انا متطر روح رفيقي عمل حادث وبدّون دم .. انا مابطول
منار : طيب اي ولا يهمك انتبه على حالك .. وطمني شو بصير معك
ماجد : اي اي ماشي
طلع ماجد ومنار قعدت وحطت ايدا على خدا وقالت شبو هاد وشو هالرفيق يلي مافطن يعمل حادث غير اليوم .. مادخلت على عقلي شغلة رفيقو .. معقول مابدو يقرب مني وعم يحن لمرتو الاولة لا لا اصلا هديك تزوجت وسافرت مدري ع وين .... بس مايكون وسكتت ... معقول ؟؟ لا ولو .. شبك منار بلش الشيطان يلعب براسك .. خليني نام ولنشوف رفيقو ايمت بصح ... ياربي بس والله مشتاقة ضمو لماجد لهلأ ماقرب مني اوووف .. لك يضرب حظي
تمددت ونامت ..
................................
ماجد دق للؤي وقلو ينزل هو ناطرو تحت بيتو .. طلع لؤي لعندو بسرعة
لؤي : خير شبك .. ليش تارك عروستك وطالع من البيت صاير شي
ماجد : اي صاير
لؤي : لك شغلت بالي قلي شو صار
ماجد : اذا بدي ارجع ع البيت بنفضح قداما لحقني
لؤي : ماجد انت ؟؟
ماجد : مابعرف شو صابني .. والله ماكنت هيك
لؤي : لاتخاف يمكن لانك متوتر
ماجد : وشو الحل هلأ
لؤي : انت شو قلتلا انك طالع تعمل
ماجد:قلتلا رفيقي عمل حادث
لؤي : هلأ بعطيك دوا وبيمشي الحال
ماجد : طيب هو عندك
لؤي : اي عندي .. تفضل فوت
ماجد : لا لا مابدي مرتك تشوفني
لؤي: طيب لحظة وراجع
طلع لؤي جبلو الدوا وعطاه اياه وماجد راح ع البيت شرب حبة وقعد بأرض الدار
ماجد : ماجد شو صرلك اهدى شو بدا تاكليني يعني .. خلص اهددى وروق .
قام دق الباب ع منار مافي رد ... فتح وفات .كانت نايمة شعرا مفرود على المخدة ... ووجها الابيض وخدودا الحمر .. قرب وقعد وصار يلمسلا على شعرا وعلى وجها هية حسيت بس ضلت مغمضة عيونا .. بعد شوي فتحتون
ماجد : اسف فيقتك
منار : لا مامشكلة قلي كيف صار رفيقك
ماجد : اااه .. اي اي منيح حادث بسيط .. انتي اذا نعسانة نامي مابدي ازعجك
منار حست فيه وقالت : اي معك حق تعبت كتير تصبح على خير
ماجد : وانتي بخير
قرب وباسها من جبينا وهية طارت من الفرح
منار بقلبا اكيد ما عم يحنلا .. وعرفت شو قصتو بس مامشكلة المهم هو جنبي ..
...........ّ.................
الصبح فاقت منار وكان ماجد نايم جنبا ..
منار : ماجد .. ماجد
فاق ماجد وقال : صباح الخير
منار : صباح النور .. يلا قوم اتأخر الوقت
ماجد : شقد الساعة
منار : ٨
ماجد : يي بدي قوم اخد الماما ع الحمام وشوف البابا
منار : يلا وانا قايمة جهز الفطور
ماجد : لا شو فطور انتي بعدك عروس
بقلبا : عرووس؟😒😒
منار : لا مامشكلة ..
قامت لبست بجامة ورفعت شعرا لفوق وشبكتون بملقط .. وراحت على ع المطبخ وبلشت تجهز الفطور .. عملت الفطور واخدت الاكل لحماتا وحماها
حطولن الفطور وطلعو
ام ماجد : شايف عاملة حالا محبة عم تتمسكن لتتمكن
ابو ماجد : معك حق .. يمكن عم تمثل قدام ماجد ..
ام ماجد :بس وحياتك مارح خليها تضحك علينا
حطت منار فطور الها ولماجد بغرفة النوم وقعدو ياكلو
ماجد : كنتي تعبانة مبارح بليل
منار : اسفة .. بس الواحد بس ياخدو النوم مابعود يصحا على شي
ماجد بقلبو : والله حبابة مين قال انها قوية
ماجد : مامشكلة نوم الهنا
منار : الله يهني بالك اكلو وقامت منار اخدت الفطور ع المطبخ .. وماجد بسرعة دق للؤي
لؤي : اي قلي
ماجد : تضرب انت وهالحبة ما صار شي ابدا
لؤي : طيب انت اتلحلح يعني اكيد مارح يصير مفعولا وانت قاعد بعيد عنها لازم تقرب منا وتتحرك مشاعرك
ماجد : طيب طيب احط
وقف ماجد قدام المراي وقال : اي والله
طلع ظرف الحب وشرب حبة تانية
راح لعند اهلو طلع الفطور من عندن واخدو ع المطبخ كانت هية عم تجلي .. قرب منهاوضما من ضهرا وهية قلبا صار يدق بسرعة
منار : ماجد شو بدك
ماجد : يعني شو بدو يكون بدي
منار : بس هلأ عم .. عم اجلي
فلتلها لعندو ومسكها من ايدا وسحبا : ماوقت الجلي هلأ
وراحو على غرفة النوم وسكرو الباب .. بعد شوي بيطلع ماجد كان يلبس كنزتو وخيبة الامل على وجهو ... قعد وهو مهموم على كرسي بأرض الدار
طلعت بعدو منار وقعدت حدو ومسكتلو ايدو وقالت : ماجد لاتزعل شغلة بسيطة .. ماجد انا بحبك
اتطلع فيها وهو مصدوم
منار : اي بحبك من لما كان عمري ١٧ سنة .. وماني مصدقة انك صرت جوزي .. مشان هيك لاتزعل وانا جنبك عطول ومارح اتركك .. وكمان هي شغلة بسيطة واي رجل ممكن يمر بهي المرحلة ..
ماجد : بس انا ماكنت هيك
منار : انا متأكدة .. يمكن من الضغوطات كل هالسنين وانت عم تشتغل وماعم تفكر غير بأهلك وهيك .. يعني معك معك بتتخطى هالمرحلة وانا جنبك
ماجد : الله يخليلي اياكي
...........................
مر اسبوع وماجد بعدو على حالو ومنار كانت عطول تعمل اجواء مشان يغير نفسيتو وكانت تعتنيني بأهلو كتير وماتخليهن يحتاجو شي .. وخلص هالاسبوع وماجد صار وقت يروح على شغلو
ماجد : منار مابدي وصيكي بأبي وامي
منار : لاتوصي حريص اهلك بعيوني
ماجد ؛ يسلمولي عيونك
طلع ماجد بعد ما اخد الرضا من اهلو ..
راحت منار ع غرفتون
منار : بتحبو جهزلكن الفطور هلأ ولا بعد شوي بكون جليت الجليات
ام ماجد : مابدنا منك شي روح انقبري عاملة حالك ادمية .. بس لا حبيبتي انا كاشفتك على حقيقتك
منار : مرت عمو ليش هيك عم تحكي معي
ام ماجد : عما الدبب الاهي .. بس مابكون ام ماجد اذا مابربيكي
منار : لك شو تربيني ما تربيني انا شو عملتلك .. عمو احكيلك شي كلمة
ابو ماجد : متل ماقالت حماتك .. نحنا عرفانين كل خطتتك بدك تصير تعذبينا ولما يجي ماجد تعملي حالك الملاك البريئ
منار : اناا بدي اعمل هيك
ام ماجد : اي انتي ..
منار كتفت اديها وقالت من الاخير شوبدكن
ام ماجد : ولا شي بس بدنا نفهمك انو اذا حاولتي تعذبيا او ماتسمعي كلمتنا مارح نسكت ورح نخبر ماجد وخليه هو يتصرف معك .. ولاتفكري اذا انتي قوية مابنقدر عليكي
منار : طيب ماشي .. اذا غلطت معكن قولو لماجد وهو يتصرف ماشي .. وهلأ انا رايحة جبلكن الفطور
طلعت وقالت : الله يساعدني عليهن .. الكبير بيرجع متل الولد الصغير
حضرتلن الفطور وفطرو وهنن عم يتزورها .. وهية تجاهلتون وراحت اشتغلت بالبيت وجهزت الغدا .. غدتون وهية نطرت ماجد لحتى يرجع المسا وتاكل معو. .
اجا ماجد المسا وبوجهو فات على غرفت اهلو
ام ماجد قبلت خلقتا وابو ظهر على وجهو علامات القهر
ماجد : ماما بابا شبكن
ماردو
ماجد : لك شبكن
ام ماجد صارت تبكي وتقول : مافي شي مافي شي
ماجد : لك لاتجننوني شوفي .. منار زعجتكن بشي
امو : مابدي احكي خليني ساكتة
ماجد : ماما احكي احسن ماروح ابتلا فيها
ابوه : لا لا اتركها
ماجد : طيب شو عملت
ام ماجد : والله يا ابني انت رحت وهية انقلبت قلب وصارت وحدة تانية غصب جابتلنا الفطور .. ولما نندهلا مشان تطالعني ع الحمام صارت تتأفأف .. وابوك بتعرف وضعو مابيقدر يطلع غصب غيرتلو تحتو
ماجد : هيك عملت معكن انا بفرجيها ... والله وماعاش يلي بهينكن بكلمة
قام ماجد راح عالغرفة وكانت منار مجهزة العشا ومظبطة حالا .. لبط الاكل برجلو ومسكا من شعر
ماجد : وليه .. شو عاملة مع اهلي
منار : والله والله ماعملت شي
ماجد : كذابة .. لك انا بمحكيكي عن وجه الارض عم تفهمي
وبلش يضربا شي على وجها وشي برجليه وهية عم تبكي وتصرخ وتقول والله ماعملت شي
وحماتا وحماها عم يتسمعو عليها وهية عم تبكي وصارو يضحكو
رماها ماجد ع الارض وهية عم تبكي وطلع من البيت مقهور ..
ومنار قاعدة بالارض عم تبكي ..
ضلت تبكي لحتى غفت مكانا .. وماجد مارجع ع البيت
صار الصبح حست منار وفاقت كان كل جسما عم يوجعا من اثر القتلة .. فتحت الخزانة غيرت تيابا وقالت : الله يسامحكن .. ياربي شوبدي اعمل معون هدول .. وهداك التاني ماصدقني وصدقون واجا عم يتمرجل علي بالضرب .. بس شاطر بالضرب ياريت يتمرجل بشي تاني ..
راحت لعندن ع الغرفة
منار : صباح الخير
ام ماجد : الله لايصبح عليكي بسرعة روحي انقبري حضري الفطور الي ولعمك
منار : حاضر
طلعت وام ماجد ابتسمت وقالت : شفت نفعتا القتلة
ابو ماجد : بس لسه بدها كم وحدة مشان تتربى منيح
حضرتلون منار الفطور وجابتو لعندن وحطتلن كل واحد فطورو لحال
طلعت وراحت تضبضب البيت حست على باب البيت انفتح ..
ماجد : منار ... منار
طلعت لعندو
منار ؛ نعم
ماجد : فطرتي اهلي
منار ،: تفضل شوف لحالك تركتو مشت . هو فات لعند اهلو
ماجد ؛ صباح الخير
امو وابوه : هلا صباح النور
ماجد : صحتين وهنا
_عقلبك
ماجد : شو كيفا منار معكن اليوم
ام ماجد : حطتلنا الاكل من غير نفس
ماجد : بسيطة ..
تركون وقام وراح لعند منار
ماجد : شكلك ماتعلمتي من قتلة مبارح
منار : ليش شو عملت بلله
ماجد : اهلي بتعامليهن بأحترام فهمتي
منار : وانا عم اعمل هيك
ماجد : كذابة
منار : لا اهلك الكذابين
ماجد : وعم تعلي صوتك علي كمان وتقولي عن اهلي كذابين
قرب بدو يضربا كف بس هية مسكتلو ايدو ومنعتو
منار : مبارح ضربتني ظلم بس اليوم مارح اسمحلك .. وانا بقدر رد عليك بس قلت انت جوزي
ماجد بخوف : شو يعني بدك تضربيني
تركتو وقالت : طبعا لأ بس انت لازم تصدقني .. اهلك والله عم يفترو علي .. عم يقولو هيك مشان تضل تضربني وضل اخدمون بدون ما احكي
ماجد : معقول
منار: اي ومعقول
ماجد : وشو الحل
منار : تركون علي .. وشو ماقالولك لاتصدقون
ماجد : وبركي انتي عنجد عم تعذبيهن
منار : ساعتها ادبحني ماشي
ماجد : طيب انا رايح هلأ ع الشغل بدك شي
منار : لا .. وعفكرة قتلة مبارح ماني ناسيتلك اياها تركو ومشت وهو راح على شغلو
منار : هلأ صار لازم حطولن حد لهل الختيارين ...فاتت ع المطبخ واخدت من البهارات علبة الفليفلة الحرة وراحت لعندن
منار : شو عاجبكن الوضع هيك
ام ماجد : اي كتير وكل يوم رح نطعميكي قتلة غير شكل
منار : مزال هيك هيك بدي اكل القتلة باكلها ع المليان احسن ما اكلها ع الفاضي
ام ماجد بخوف : شو شوقصدك
منار : اطمنو مارح اضربكن لانو مابتلقو كف مني ..رفعت عن اديها وطلعت علبة الحر من جيبتا وقالت هيك
ام ماجد : اذا بتقربي بنتفك بسناني
منار : هههه مابتقدريلي
ابو ماجد : ضبي حالك يابنت
منار : انا ضابة حالي بس انتو طلعتو الشريرة يلي جواتي
قربت لعند ابو ماجد حاول يقاومها بأديه بس ماقدر بتحتلو تمو غصب عنو وحطتلو بتمو حر .. وكمان لمرت عما
ابو ماجد : عطيني مي .. مي
ام ماجد : الله لايسامحك .. جبيلنا مي تمي صار نااار
منار : خرجكن بتستاهلو
ام ماجد : والله اذا ماجد لخليه يطلقك فورا
منار : لأ بلشتي تغلطي .. اذا بدك تقوليلو لماجد مارح اعطيكي مي
ام ماجد : ااااه .. الله لايوفقك يابنت الحرام
ابو ماجد : لك عطيني مي رح موووت
منار : بالاول وعدوني انو مارح تقولي شي لماجد
ام ماجد : خلصينا مارح نقلو
ابو ماجد : لك مارح نقلو عطينا مي
منار وعدوني
ام ماجد : وعد وعد
ابو ماجد : وعد
راحت جابتلون كاسة مي وحليب مشان يروح الحر
...........................
ماجد بشغلو شارد كيف مسكتلو ايدو وكانت قبضتا قوية
ماجد : انا هي كيف بدي وقف قداما والله بتاكلني بلا ملح...معقول عم تعذب اهلي عنجد ..اذا عنجد رح طلقا واخلص منا .. لالا شو طلقا وهية بعدا بنت ..والله بنفضح بالضيعة ... بس كمان حكيا فيه وجهة نظر يمكن اهلو خايفين منها وهيك عم يعملو .. ياربي انا شو عملت بحالي شو كان بدي بهل الجازة
...........................
منار : شو راح الحر
ماردو
منار : عملتكن كاتو طيب رح يعجبكن
ام ماجد : مابدنا
منار : تصتفلو .. رح حطون هون واذا بدكن كلو واذا مابدكن بعد شوي باخدو
حطت لكل واحد صحن فيه قطعة وشوكة وطلعت
منار : ان شاء الله يكونو تربو .... بس اكيد رح يخبرو ماجد اليوم احسن الشي اتخلص من الفليفلة
راحت بوجها فضت علبة الفيلفلة بالزبالة وربطت الكيس وطلعت كبتو بالحاوية
ابو ماجد وام ماجد ماقدرو يقاومو ريحة الكاتو
ام ماجد : انا رح اكل لانو هاد عحساب ابني
ابو ماجد : صح معك حق
اخدو الكاتو وصارو ياكلو.. وعجبون كتير وكمان صرلن زمان محدا عملون هيك شي و اهتم فيهن
رجعت منارلعندن وشافتن اكلو وفرحت
منار : شاطرين اكلتو الكاتو يلي حاططتلكن فيه سم
انصدمو وصارو يتطلعو ببعض
منار : ههههههه لاتخافو ماني حاطة شي .. بعدين مانكن محرزين لحتى فوت ع النار من وراكن اخدت الصحون وطلعت
ام ماجد : الله لايوفقا فكرتا عنجد حاطتلنا سم
ابو ماجد : بس يمكن بتعملا لازم ننتبه
ام ماجد : معك حق
اجا ماجد المسا وفات بوجهو عغرفة اهلو
ام ماجد : دخيلك يا ابني طلقا اليوم كانت رح تموتنا انا وابوك حطتلنا حر بتمنا
ماجد طلع النار لراسو وقام بسرعة لعندا كانت محضرتو العشا
ماجد : منار عنجد حطتيتي حر لامي وابي
منار : اناااا ؟؟
ماجد : اي انتي
منار : اهلك مابدون اياني والله مابعرف ليش .. مع انو بضل مهتمة فيهن طول اليوم وكمان عملتون كاتو وحبوه كتير
ماجد : لا تغيري السيرة انتي حاطتيلون حر
منار : لا اصلا ماعنا حر كنت بدي حط للمعكرونة رشة ومالقيت
ماجد : عنجد
منار : اي عنجد .. روح اتأكد بنفسك
راح ماجد ع المطبخ ودور بعلب البهارات ومالقا حر ..
منار بغنج : شفت انو انا مظلومة والله انا بحبون متل اهلي واصلا لو مابدي اعتني فيهن ماكنت قبلت فيك من اصلو .. وفيك هلأ تروح تتأكد كيف غرفتون مرتبة وتيابون نضيفة عكس اول
ماجد ماحكي
منار مع ابتسامة : يلا تعال نتعشى هلأ بيبرد العشا
ابتسم ومشي وراها
ماجد : طيب هنن ليش هيك عم يعملو
منار : بدون يتأكدو انو ماعذبون بيوم من الايام وضل خايفة منك واخدمون بتم ساكت
ماجد : طيب شوبدي اعمل
منار : هنن لما يشوفو انا شقد عم حبون مارح يشتكولك مني والكبير بصير متل الولد الصغير تماما .. ومشان يقتنعو انك عم تسمع مني لازم تقوم تضربني
ماجد: اضربك ؟
منار : مو هيك .. بس انت اضرب ع التخت وانا بصير اصرخ وابكي
بلش ماجد يضرب على التخت ومنار تصرخ وتبكي
.......................
ابو ماجد وام ماجد عم يضحكو ويقولو الله لايقيمها
...........
الصبح .. ماجد راح على شغلو كالعادة .. ومنار جابت الحر كانت مخباي شوي بغرفتا وفاتت لعندن
منار : ماقتلكن لاتخبروه .. انتو جنيتو على حالكن
ام ماجد : لا لا تقربي
قربت منار وحطتلون حر وهنن ماقدر يقاوموها
ام ماجد : لك الله لايوفقك ..
منار : طول ماعم اكل قتل من ماجد رح ضل حطلكن حر
ابو ماجد : والله اذا ماطلقك اليوم لاغضب عليه
منار : ههههه مابيقدر يطلقني
ام ماجد : وليش بقا مفكرة حالك انجيلا جولي
منار : والله طلعتي بتعرفي انجيلا جولي .. لا مو لاني انجيلا جولي .. لانو ابنكن مانو رجااال
ام ماجد اوبوه : شوووو
منار : متل ماسمعتو .. وانا بعدني متل ماجيت من عند اهلي وانا صابرة عليه لانو بحبو مشان هيك حاج تكذبو على ابنكن وتخلوه يضربني ومايقدر يطلقني .. اسمعو رح جبلكن مي وراجعة
راحت جابتلون مي واجت
منار : رح اعمل معكن اتفاق لاانتو بتكذبو على ماجد ولا انا بحطلكن حر .. والقرار بأيدكون وطلاق مارح يسترجي يطلقني .. انا مابهمني تعودت ع القتل كل يوم شو قلتو
ماردو
منار : السكوت علامة الرضا ... انا رايحة حط بريق الشاي ع النار واجي طالكن ع الحمام
ام ماجد : معقول ماجد مانو رجال
ابو ماجد : الله يسود وجهك ياماجد ... خلص تركيها لهي الشريرة لشوف اخرتها
ام ماجد : ماطالع بأيدنا شي ولا ابنا بينفضح بالضيعة
.........................
المسا اجا ماجد وفات لعند اهلو
ماجد : شو ماما بابا عزبتكن منار اليوم
ابوه وامو : لا الظاهر نفعتا القتلة تبعت مبارح
ماجد : اي منيح كتير .. انا قايم اتعشى وراجع اسهر معكن
امو : اي الله يعطيك العافية
راح ماجد لعند مرتو
ماجد : شو عملتي لاهلي اليوم حتى ماحكو شي
منار بقلبا: واخيرا
منار: ولا شي بس قعدت معون وقلتلون انو معد استحمل ضرب ماجد وانو انا رح ضل اخدمون طول العمر يمكن شفقو علي ..
ماجد : الله يرضا عليكي
قعدو يتعشو
ماجد : انا اليوم رحت عدكتور
منار : وشو قلك ؟
ماجد : قال انا صحتي كتيرة منيحة .. ومافيني شي
منار : لكن شو القصة
ماجد : الدكتور قلي يمكن مشكلة نفسية
منار : خلص حبيبي مافي داعي .. انا متأكدة منك ووجودك جنبي بكفيني
ماجد : بس بدنا نضل هيك متل الاخوات وكمان مابدنا نفرح بولد يملي علينا حياتنا
منار : انت شو ناوي
ماجد : بدي روح ع دكتور نفسي
منار : طيب اعمل يلي بريحك
ماجد : الله يخليلي اياكي وما يحرمني منك
منار : وانت كمان
...........................
الصبح فاتت منار لعند عما ومرتو
منار : برافو عليكن .. اليوم مارح حطلكن حر بس اذا عدتوها رح ارجع حطلكن حر وكمان نار اكتر من هاد
ام ماجد : الله يخلصنا منك
منار : يلا بلا علاك فاضي جهزي حالك رح حمي الحمام وحممك انت وجوزك
ابو ماجد : انا ماجد بحممني
منار : خلصنا ما انا عم غيرلك كل يوم وكمان متل بنتك او اعتبرني ممرضة خلصنا هلأ ولاتعمل حالك خجلان
............................
ماجد عند الدكتور
الدكتور : انت شو كان مكركبك قبل العرس
ماجد.: انا لا مافي شي
الدكتور : لا في شي وهو اسر على شخصيتك
ماجد : مافهمت متل شو
الدكتور : انت عندك رهبة من شي وخايف من حدا .. مثلا متقاتل انت وشخص او يمكن يكون عندك رهبة من ليلة العروس او هيك شي ..
ماجد : اممم .. بصراحة دكتور
الدكتور : اي ؟
ماجد : كنت خايف من العروس
الدكتور : ههههه عنجد
ماجد : اي لانو قبل العرس كل الناس تحذرني منها انها قوية
الدكتور : وهية عنجد قوية
ماجد : اي
الدكتور : ومعك
ماجد : لا معي كتير منيحة .. هية قوية عند الحق يعني مابتسكت عن حقا
اادكتور : اي هي هية انت عندك رهبة منها وصار عندك ضعف شخصية وانك اقل منها
ماجد : دكتور وشو الحل
الدكتور : شوية وقت وكمان رح اعطيك مهدء وكمان تضل تقول بينك وبين حالك انا رجال انا رجال .. لازم تقنع حالك انك رجال عن حق وحقيق
ماجد : طيب ان شاء الله
الدكتور : واذا بتصارح مرتك بهل الشي وهية تتعاون معك رح تتخطاها بسرعة
ماجد : شكرا دكتور
طلع ماجد من عندو وهو عم يقول : ياحبيبي شو قلا لمنار انا بخاف منك ... بس لازم صارحها
............................
منار : اوووف هلكتوني تقول صرلكن سنة مو متحميين .. بس طلعتو عم تضوا ضوي
اجت بدا تطلع بس وقفت والتفتت عليهن وحطت ايدا عتما بحيرة
قربت وصارت تشيل الطاولة يلي بتفصل بين التختين
ام ماجد : لك شو عم تعملي يامصيبة
ماردت منار بعدت الطاولة وصارت تسحب تخت ام ماجد لعند تخت جوزا
ام ماجد : لك رح توقعيني شو عم تعملي
برمت منار لتاني جهة وصارت تدفش بالتخت وقالت : انت ما اشتقتو لبعض .. عم خليكن تشبعو من بعض قبل الله ماياخد امانتو هههه
ضلت تدفش بالتخت لحتى صارو تخت واحد
منار : بعرف انك مشلول بس ضمة بتكفي هههه
صارت تضحك وطلعت وسكرت عليهن الباب
ابو ماجد وام ماجد عم يتطلعو ع بعض وحسو بنوع من الخجل لانو صرلن زمان كل واحد بزاوية
ابو ماجد ابتسم وفتح اديه وام ماجد رمت حالا بحضنو
كانت منار عم تتفرج عليهن من الشباك ابتسمت وراحت .... فجأة انفتح باب الدار وكانت اخت ماجد
الهام : مرحبا منار
منار : هلا
الهام : مشان الله لاتواخذيني ماعم اجي اشغتل بأهلي بس والله ابني كان مريض
منار ولا يهمك حبيبي وعسلامتو ابنك
الهام : الله يسلمك ... انا فايتة لعندن شوف شوبدن
منار : لا لا
الهام : ليش
منار تعي شوفي قربو من الشباك وشافتون نايمين بحضن بعض
الهام : بخرب بيتك شو عاملة
منار : حرام بكونو مشتاقين لبعض ههههه
الهام : والله ماخطرتلي هالفكرة
منار : الله يساعدك كان يادوبك تلحقي على ولادك
الهام : عنجد انك بنت اصل
منار : تسلمي .. وبدي منك ماتاكلي همون انا بحطون بعيوني
قعدو شربو قهوة وحكو شوي
الهام : انا صار لازم روح .. بس بدي شوفن بالاول
منار : دقي الباب عليهن بالاول
الهام : ماشي
قامت الهام فاتت لعند اهلا ومنار شالت القهوة ع المطبخ
قعدت شوي الهام مع اهلا بس ماحكو شي عن منار نهائيا
...........................
المسا
منار : ههههههههههههه
ماجد : شوفي بضحك
منار : عنجد انت بتخاف مني
ماجد : تضبضبي يابنت انا بدي خاف منك
منار :هههههه حاضر ابن عمي .. بس احكيلي بالتفصيل
ماجد : كنت خايف ابتلا قد ماكانو يقولو عنك قوية
منار : الله لايسامحون كلشي كان يحكي عني هيك .. هلأ انا صح قوية بس وقت الحق والله
ماجد: هههه مصدقك مصدقك
قام ماجد تمدد على التخت ومنار لحقتو ونامت على صدرو
منار : هيك كانو نايمين امك وابوك اليوم
ماجد.: يعني عم تقلدي امي وابي ومابدك تقربي مني
منار : هههه لا بالعكس بس حجتين بحجة
ماجد :منار
منار : قلي
ماجد : انت كتير حنونة وقلبك طيب
منار : بعرف هههههه غمضو عيونن ومنار صار تفكر بحكي ماجد وشو قلو الدكتور وفهمت انومنار لازم تحسسو برجولتو اكتر وانو هو رجال واذا هية كانت قوية لازم تبين اضعف منو
...........................
بعد يومين
فاتت منار لعند حماها وحماتا
منار : صباحو ياختيارة
ام ماجد : الله لا يصبح عليكي
منار : لك انتي لايمت بدو يضل لسانك متبري منك .. بس مامشكلة مزال كلو حكي بحكي .. يلا تجلسي وقعدي منيح لجلس عمي انا
ابو ماجد : ليش شوبدك تعملي
طلعت من جبيتا ورق شدة وقالت : ماالة وبدي العب معكن ..طبعا هية مانها مالة بس مشان يغيرو جو شوي
ام ماجد : بس انا مابدي العب
منار : مو على كيفك ولا بجيب الحر .... شوو بتلعبي
ام ماجد : امري لالله
منار : انا مابعرف العب .. انتو شو بتعرفو تلعبو
ابو ماجد : انا بعرف العب طرنيب
منار : بلله شو هي صعبة وكمان بدا اربعة ونحنا بس ٣
ام ماجد : انا بلعب باصرة
منار : اي هي انا بعرفا .. بس هي بس بتلعب تنين .. يلا العبو قدامي لأتعلمها منيح وانا بلعب بالدق التاني
ام ماجد : اي هاتي هالورق لهون نقطة ترشك اذا بتعرفي تلعبي شي
منار : فرجينا شطارتك ياختيارة
ام ماجد : اي هلأ شوفي
اخدت منها الورق وبلشو يلعبو ومنار قعدت تتفرج عليهن وهية مبتسمة لانو شافتون مبسوطين .. وقررت تنسحب
منار : ييي نسيتوني عندي غسيل
ام ماجد : اي قومي قومي الله يكسرلك اديكي
ماردت منار وطلعت راحت على غرفتا فتحت تلفونا وصارت تقلب بالتلفون ..وهية عم تقلب خطرتلا فكرة. .. راحت صارت تبحبش بالبيت وصارت بالزاوية وجنب البلوعة
منار : لقيتك
مدت ايدا ومسكت صرصور كبير من جناحاتو وقالت : كيف كنت ناسيتك حطتو بالارض وراحت على التلفون ودقت لماجد
منار : ماجد مشان الله لحقني
ماجد : شوفي شو صاير
منار : مشان الله ليكو واقف هون وشواربو كبار وماعم يروح
ماجد : لك مين هااااد
منار : صرصور
ماجد : هلأ كل هاد لانك شفتي صرصور
منار : مشان الله انا كتير بخاف منو تعال اقتلو
ماجد : منار لاتجني كلو صرصور ضربيه بشي شحاطة
منار : عم قلك مابسترجي كتير بخوف ومقرف كمان
ماجد : خلي شي ولد من الحارة يجي يقتلو
منار : مافي حدا كلون بالمدرسة مشان الله هو بأرض المطبخ انا مابفوت ع المطبخ طول ماهو موجود
ماجد: خلص لاتفوتي لحتى اجي
منار : لك مابدي طعمي اهلك وحضر اكل مشان الله تعال هلأ
ماجد : جاي جاي
اجا ع البيت ومنار بينت كتير خايفة
ماجد : عنجد خايفة من صرصور
منار : اي والله كتير بخوف
ماجد : بعدي هيك وينو
منار : بأرض المطبخ .. راح ع المطبخ وشافو
ماجد : يالطيف ما اكبرو عنجد بخوف منيح ما اكلك
منار ،: لا تتمسخر والله بخوف
قرب ماجد طلع محرمة من جيبتو وشالو .. وقربو من منار وقال : هاد هو يلي مخوفك
منار : لا لا لاتقربو مني
ماجد.: بدي خليه ياكلك
منار : لا لا صارت تركض وهو يلحقا فيه .. بالاخير صارت تبكي
منار : بكرهك بكرهك
رما ماجد الصرصور لبرا واجا لعندا وقال : خلص كبيتو
منار : قول والله
ماجد : والله
قامت ضمتو وصارت تبكي عصدرو ... وبينت قدامو قديش هية ضعيفة وبحاجتو .. وهو حس قديش هية ضعيفة وبلش يحس بشعور حلو تجاها ومن قربها منو
ماجد : انا اتأخرت يلا بشوفك المسا
تركها وراح وهية صارت تضحك .. وراحت تشوف عما ومرت عما
ام ماجد : سمعت صوت ماجد كان هون ؟
منار : اي جبلي شوية غراض
ام ماجد : ايه
منار : خلصتو لعب
ابو ماجد : اي
منار : ومين ربح
ام ماجد : مادخلك وروحي على شغلك
منار زورتها واجت بدا تطلع سمعت الجامع عم يأذن الضهر ... التفتت عليهن وقالت : لك صحي انتو ماعم تصلو
اتطلعو ببعض وماحكو
منار : ليش ماعم تصلو
ابو ماجد كان متعاون مع منار ويرد عليها : انا مابحس على حالي وبضل ماني طاهر
منار : وانتي ختيارة
ام ماجد : مافي حدا عم يوضيني
منار : طيب ماشي .. انا رح جيب مي وجاط لحتى تتوضي .. وعمي انت ع اذان العصر بغيرلك وتصلي العصر والضهر سوا قبل مابنقض وضوئك وبظن مافيها شي لانو ليس على المريض حرج اذا جمعتون .. وكمان بتصلو وبتكسبو كم حسنة
جابت منار مي وضت حماتا وهية غسلتلا رجليها .. وام ماجد صلت الضهر .. وع وقت العصر اجت منار غيرتلوو وطهرتو وخلتو يصلي الضهر والعصر مع بعض
المسا
ابو ماجد : انا حاسس انو ظلمناها لمنار
ام ماجد :........
............................
بغرفة ماجد ومنار
ماجد : شو اخبار اهلي حاسس نفسياتون منيحة اليوم
منار : اي لانو خليتون يصلو
ماجد : عنجد
منار : اي شو ناقصن طول اليوم قاعدين خليهن يعبدو ربون احسنلون
ماجد : اااخ ما اقواكي ههههه
منار : لك انا ماني قوية .. انا والله بريئة
ماجد : يسلملي البريئ
حطت راسا على صدر وضمها اكتر
ماجد.؛ منار بتعرفي شو
منار : شو
ماجد : عم حبك
نفضت حالا وتجلست واتطلعت فيه : عم تحكي جد
ماجد : اي والله جد
منار : طيب رجاع قولا
ماجد : بحبك بحبك
منار رجعت ضمتو وهية مبسوطة
ماجد : كنت مفكر انو الحب بس للمراهقين وماكنت مفكر انو المتزوجين بحبو بعض .. كنت فكر انتو تزوجو مشان يكملو مع بعض ما اكتر
منار : وهلأ شوو
ماجد ؛ هلأ اقتنعت انو مافي حياة بلا حب ومابيقدر حدا يكمل مع شخص اذا هو ما حبو
منار : تقبر قلبي
ماجد : ان شاء الله تكمل معي وتصيري مرت عنجد ورح فرجيكي الحب على على اصولو
منار : هههه اي انتبه على حالك لايطقلك شي عرق
ماجد: عم تتمسخري يا منار انا بفرجيكي
مد اديه وصار يكركرا وهية تضحك بعدين قامت وصارت تدور بالغرفة وهو يلحقا من مكان لمكان .. لحتى مسكا ونيما على التخت وصارت تحتو .. صفنو ببعض وهو صار يتأملا ويتأمل عيونا وخدودا وشفافا وصدرا واديها البيض وعلى شعرا المطشوش على التخت .. وتسارعت انفاسو وهية كمان عم تتطلع على عيونو وعلى لحيتو يلي زادتو جاذيبة وعلى تمو الناعم ..
ماجد حس حالو صار جاهز فجأة .. بس بعد عنها وما قرب .. خاف يخيب املو وماتكمل معو وكمان حب يتأكد انو هو منيح مية بالمية
ماجد : يلا قومي انام حاج اتأخر الوقت
منار بقلبا: احلا لحظة بس ياريت كملت
........................
تاني يوم راح ماجد على الشغل وهو مبسوط والضحكة معد فارقت وجهو
شافو ابو علاء زبون المحل
ابو علاء : شو ماجد شايفك مبسوط ومشقرق
ماجد : اي والله ياعم الحمد لله
ابو علاء : وكيف ملاقي هالجازة
ماجد : والله ندمان على كل لحظة روحتا وانا عزابي .. وخصوصا مع مرتي عنجد عم تعوضني وحنونة على اهلي يعني مريحتني .. الحمد لله صبرت ونلت
ابوعلاء بتعجب : انت اخدت بنت ابو اسعد ماهيك
ماجد : اي والله
ابوعلاء بقلبو : هية يلي كانو يقولو عنها قوية طلعت مافي منها .. ونحنا النسوان يلي عنا عأساس ادمية والقط بياكل عشاها .. لك مكرهتني حياتي .. ايه الله يهنيه هالماجد والله بيستاهل
ماجد : وين شارد عم
ابو علاء : ولا شي .. اي الله يهنيك يارب وبالرفاه والبنين ان شاء الله
ماجد : تسلم ياعم .
راح ماجد يكمل شغلو .. وشافو لؤي
لؤي : شو مبسوط .. ان شاء الله مشي وضعك
ماجد : اي الحمد لله
لؤي : يعني نقلك مبروك ياعريس
ماجد : لا لسه ماصار شي
لؤي : لك ليش
ماجد : بدي اتأكد انو انا صرت منيح مية بالمية
لؤي : معك حق ..
.......................
بالبيت فايتة منار من باب الدار وكانت جايبة غراض للبيت .. وكملت لعندن
منار: اتأخرت عليكن
ام ماجد : لا وين كنتي
منار : بالدكان .. وشوفو شو جبتلكن
فتحت كيس وكان فيه بطاطا شيبس وبسكويت وسكاكر
ام ماجد : شو هاد .. هاد الاكل بضرنا
منار : لا مابضر هية هالمرة .. وكمان اذا مابدك تاكلي عمي بياكل ماهيك
ام ماجد : اي انا باكل يسلمو اديكي يابنتي
منار : لك دخيلو .. هي الناس يلي بتفهم ..
عطتون لعما وهمست بأدنو طعميها معك حرام ههههه
طلعت منار وابو ماجد اتقاسم الاكلات بينو وبين ومرتو
المسا ماجد اتأخر .. فاتت منار لعند عما ومرتو وقعدت
ابو ماجد : شو ماجد لسه ما اجا
منار : لا حيكتو قال رح يتأخر شوي عندن سيارة علف عم ينزلوها
ابو ماجد الله يقويه
اتطلعت على التلفزيون كان محطوط على الاخبار والريموت مع حماتا
منار : يعني مامليتو من الاخبار هاد وضع البلد وماعم يتغير
ام ماجد : ماعاجبك قومي اتفرجي بغرفتك
منار : لا ياستي بدي اتفرج هون وهاتي الريموت لهون
سحبت منها الريموت غصب عنا وصارت تقلب بالقنوات
لحتى تطلعت قدامها قناة اغاني وخلت عليها
منار. : غيرو شوي لسه اخبار اخبار
ام ماجد : يعني وشو رح نستفيد من الاغاني
منار : اتسمعو
ام ماجد : لا قصدي قومي ارقصي شي شوي
منار : بلله شو مفكرتيني رقاصة
ام ماجد : لا بس قومي خلينا نشوف هزك
منار : هو بصراحة انا مازيادة بس صفقولي مشان اتحمس
ام ماجد: امرنا لاالله بنصفق
قامت منار وصارت تحرك اديها يمين وشمال وكانت رقصتا على قدا ..
ام ماجد ابتسمت وصارت تصفق وابو ماجد كمان صار يصفق وصارو يضحكو
منار : عم تضحكو علي خلص بطلت ارقص
ام ماجد : هههه لا لا كملي والله حلو
منار : شو انتي عم تحكي وتضحكي معي شو القصة
ام ماجد : ولا شي يلا كملي الرقصة
منار : شو رضيتي عني ؟
ام ماجد : خلصينا كملي هلأ لتخلص الغناي
منار : مابدي كمل لحتى تحكي
ام ماجد ،؛ خلصينا رضيت عنك بلوة والله بلانا فيها متطرة استحملك
منار : دخيلو التقيل ..
صارت ترقص وتمسك اديهن وترقصون وهنن قاعدين
فات ماجد من باب البيت وسمع صوت الاغاني والضحك من غرفة اهلو قرب من الشباك شاف منار عم ترقص وترقصون ويضحكو من قلبون وهو ابتسم لما شافون مبسوطين .. وركز نظرو على منار كيف عم ترقص ابتسم ابتسامة خبث وفات لعندن
منار لما شافتو وقفت بسرعة وخجلت
ماجد : ليش وقفتي كملي
منار : لا بخجل
ماجد : معقول بتخجلي من زوجك
منار : اي ماني متعودة
ماجد : اممم .. تعشيتو (وجه السؤال لاهلو)
ابو وامو : اي تعشينا
ماجد : اي بدكن شي عايزين شي
امو : لا رايحين عشي مكان
ماجد : ااه لأ بس بدي منار تحطلي عشا
منار : لا مابدن شي صلو العشي وتيابون نضيفة وكلشي نضيف وشربو الدوا وهلأ وقت نومن
ماجد : اي لكن تصبحو على خير
ابوه وامو : وانتو من اهلو
مسك منار من ايدا وسحبا وهية استغربت من تصرفو بس حبت هالشعور
منار : انا رايحة سخن الاكل
هو بعدو ماسكا سحبا وقال : ماني جوعان ... وسحبا ع الغرفة .. تركلا ايدا وقرب من مسجلة متوسط الحجم وشغلا وصارت تغني
منار : شو يعني
ماجد : يعني ارقصيلي
منار : لا لا بخجل
ماجد : عجب رقصتي مع امي وابي
منار : مابعرف بس قدامك بخجل
ماجد : طيب رح ارقص معك ... هاتي ايدك
سحبا من ايدا وصار يرقص ايد بأيدا وايد عم يرقص فيها بالهوا .. هية واقفة وصافنة فيه
ماجد : خلصينا بدي ارقص لحالي يعني
صارت تتمايل وايدا بأيدو
خلصت الغناي ووقفو رقص وصارو يتطلعو ببعض .. ماجد كان يتطلع عليها نظراة فيها حرارة
منار خجلت وبعدت نطرا عن نظرو
منار : انو بكفي خجلتني وانت عم تتطلع علي
ماجد : ههههه اذا من نظرة خجلتي شوبدك تعملي بعد شوي
منار : ليش شوفي بعد شوي
مسكها من اديها التنتين وجذبا لعندو وضما وهمس بادنا بحبك كتير ياعروستي
بعدت عنو وقالت بنبرة سؤال : ماجد ان .. انت
ماجد : عندك شك
هزت براسا بخجل انو لأ
ماجد : انا فايت اتحمم وراجعلك مابدي تكون اول ليلة وانا هيك شكلي
ابتسمت وماحكت
.............................
الصبح فاقت منار ولقت حالا بحضن ماجد واتذكرت شو صار ليلة مبارح وكانت طايرة من الفرح
تجلست وصارت تفيقو
منار : ماجد .. ماجد ..حبيبي قوم
فتح عيونو والابتسامة على وجهو تجلس ومسكلا اديها وباسون وقلا : مبروك
منار ؛ مبروك علينا
ماجد : الله يخليلي اياكي
.......................
بعد اسبوع
عم تمسح الارض بغرفت حماتا
ام ماجد : شو اخبارك انتي وماجد
منار : كتيرة مناح
ام ماجد. : وماجد لسا..
منار : هههه لا مشيت اوضاعو وصار تمام التمام
ام ماجد : اي الله يخليكن لبعض
ابو ماجد: بنتي سامحينا لانك اكلت قتل بسببنا
منار : مامشكلة وانتو كمان سامحوني لاني حطتيتلكن حر
بالاثناء اجا ماجد ع البيت كان جاي ياخد شغلة وسمع ام ماجد من نوع المزح : الله يسامحك دبحيتنا بالحر
منار : ههه بتستاهلو لولا هيك ماكنتو صرتو اوادم
ماجد سمع هيك وجن جنونو ماعرف انو عم يحكو عن مزح وفكر جد وانو منار عم تعذب اهلو بغيابو .. دفش الباب وفات
منار : اهلا حبيبي
قرب ماجد ومسكا من شعرا وقال شو هاد يلي سمعتو وليه
منار : اااه لك تركني عم توجني .. شو سمعت
ام ماجد : شبك اترك البنت
ماجد : كنتي عم تحطي حر لاهلي وتعزبيهن
ام ماجد : لا ابني انت فهمان الموضوع غلط
ماجد : شو غلط ما غلط .. شو خايفين منها احكو لاتخافو كانت تعذبكن صح
ابوه : ماجد اهدى البنت ماغلطت
ماجد : شو ماغلطت .. وليه منار كنتي تحطي لاهلي حر اي او لأ
منار وهية عم تبكي : اي حطتيتلون بس اسمعني بالاول
ماجد : ماني سامع شي .. هلأ بتروحي على غرفتك بتضبي غراضك وعلى بيت اهلك
ابوه وامو : ابني لاتغلط البنت ماغلطت
ماجد : انتو خايفين منها لك انا هلأ بقتلا وبخلصكن منا المهم ماحدا يأذيكن ولو بكلمة
منار عم تبكي وتقول : ماجد اسمعني
ماجد دفشا ع الارض وقال بدي اجي مابدي شوفك هون عم تفهمي
تركون وراح وامو وابوه عم يعطولو وهو مايرد
قامت منار وهية عم تبكي واتجهت لتطلع من الغرفة
ابو ماجد : ع وين
منار : لعند اهلي
ام ماجد : وبدك تتركينا
منار وقفت وماحكت
ابو ماجد : من هالبيت ما لك طلعة وماجد فهم غلط وحتى يجي انا بفهمو القصة
منار : هو قال مابدو يشوفني هون
ام ماجد : هو بروح وانت لأ .. نحنا بنقدر نعيش بدونو بس بلاكي مابنقدر .. لما كنتي تروحي لعند اهلك نضل طول اليوم مقهورين وزعلانين ... ونحنا يلي لازم نتعاقب مو انت نحنا يلي ظلمناكي بالاول وخلينها يضربك ظلم
ابو ماجد : يلا روحي غسلي وجهك وهلأ حتى يروق ويرجع رح خليه يجي ويعتزر منك ويبوس ايدك .. عجب اول ماكان يحكي ولا هلأ لما صار زلمة صار الو لسان يحكي
تركتون وراحت على غرفتا وصارت تبكي وتتزكر حكي عما .. انو صح قبل ماكان يسترجي يحكي هلأ بعد ماصرت مرتو عنجد صار يتمقطع فيني...
ماجد كان كتير مقهور وحس انو اتسرع ورجع ع البيت فورا
اول مافات ابوه عيطلو وقف وصار يتطلع مافي حس لمنار وفكر انها راحت لعند اهلا .. فات لعند اهلو
ماجد : اي ابي
ابو ماجد : اقعد هون
قعد ماجد بدون مايحكي
ابو ماجد : انت يا ابني فهمت الموضوع غلط
ماجد : وشو الصح
ابو ماجد : نحنا اول ما اجت منار ع البيت افترينا عليها وخليناك تضربا ظلم ..صح هية حطتلنا حر بس مشان نقوف نعمل هالشي وكانت عم تعاملنا متل الولاد وتهتم فينا .. ونحنا افهمنها وعرفنا انها بنت اصل ومستحيل تضرنا ..
ماجد : بس مع هيك ماكان لازم تحطلكن حر
ام ماجد : كانت ممكن تعمل معنا اي شي يمكن تضربنا ويمكن تحرقنا بلنار بس لقت انو الحر اسهل طريقة مشان ما تأذينا
ابو ماجد : قوم هلأ راضيها واذا ماراضيتا بغضب عليك
قام ماجد وراح على غرفتو .. كانت قاعدة بزاوية الغرفة وعم تلعب بالتلفون
منار : انا كنت بدي روح لعند اهلي بس اهلك ما خلوني وكمان انا مستحيل اتركون .. سماع ماجد هو صح انا غلطت بس ماكان في غير هالطريقة .. بس انا عتبانة عليك لانك اولا ماسمعتني وكمان بسرعة قلتلي روحي لعند اهلك بعد ما اتأكدت انك رجال اما قبل ماكنت تسترجي تقلعني مشان ما افضحك
ماجد : انا
منار : لا تقول شي انا بعرف وفهمانة كلشي اصلا انتو الزلم كلكن هيك .. المهم من كل هالحكي انو انا معد بدي اياك زوج انا هون لحتى اخدم امك وابوك وبس واذا بدك تتزوج انا سامحتلك واذا بدك بروح بخطبلك اياها
ماجد : انت شو عم تخبصي .. انا بحبك وبدي كمل معك
منار : لأ لو بتحبني عنجد مابتعمل معي هيك .. انا يلي عندي قلتو
طلعت من الغرفة وقالت تصبح على خير وطبشت الباب
هو ضل واقف مكانو وماحكي بس كان مقهور كتير
وبلشت تمر الايام ومنار كانت متجاهلة وجود ماجد نهائيا وماكنت لاتحكيه ولا تقرب منو
خلصو عشا وقامت تجلي الجليات .. قام لحقا وسكر الباب
ماجد : لايمت بدك تضلي هيك معي
منار : انا يلي عندي حكيتو
ماجد : بس انا ماحكيت يلي عندي
منار : تفضل
ماجد : انا بحبك ومابقدر على معاملتك الي بهي الطريقة
منار : ماذنبي واذا ملاقيني عم قصر بحقوقك فيك تطلقني .. واطمن اهلك مارح اتركون ورح طل عليهن كل يوم
ماجد : بس انا مابدي طلقك انا بحبك وبدي اياكي
منار : لكن روح اتزوج
ماجد : ياربي دخيلك بحكيها من الشرق بترد من الغرب .. منار بدك ترجعي متل اول ولا لأ
منار : لأ
ماجد : عند كلامك
منار : اي
ماجد : اي بسيطة
تركها وراح .. وهية قلبا صار يدق بسرعة وخافت لا يعملا ويتزوج عنجد
منار : لك شو عم خبص معقول يعملا
وضلت على هالحالة يومين محتارة شو تعمل وماجد معد اتقرب منها نهائيا .. لانو اذا حاول يراضيها كانت ناوية تقبل ومابدا تتنازل وتروح هية تراضيه
صار يندق الباب وكانت اختو الهام .. مسكتا ووقفت هية واياها قدام الباب
منار : شبك فوتي ليش وقفتيني هون
الهام : شو صاير بينك وبين ماجد
منار : ليش شوفي
الهام : طلب مني دورلو على عروس
نزلت هالكلمة على منار متل الصاعقة
الهام : منار ردي علي وين رحتي
منار متماسكة : ومالقيتيلو
الهام : يعني ماعندك مانع
منار : لأ طبعا ..
الهام : ليش شو صاير فهميني
منار : ولا شي هلأ انتي بدك تفوتي ولا تروحي
الهام : لأ رايحة سلام
منار : الله معك
راحت الهام وشعلت الغيرة بقلب منار طبعا كل النسوان هيك بقلو للزلمة روح اتزوج وبس تسمع حدا قرب من جوزا بتجن
منار : لكن بس بدو كلمة ... ولأ شو قال بحبني .. العما شو كذاب .. لسه ماهبلت تمي صار يدور على عروس بأديه ورجيله .. اي طبعا رجااااال وبدو يتزوج وحدة تانية .. الله يرحم ايام زمان لما كنت حسو متل اخي .. بس بسيطة يا ماجد انا بفرجيك
المسا اجا ماجد فات ع البيت وهو عم يدندن ويغني
منار طلعت ووقفت قدامو وحطت اديها على خصرا ورجلا عم تهز ع الارض
منار : شو باينتك مبسوط
اتطلع عليها بطرف عينو وقال : وانتي شو دخلك ما عأساس كل واحد بطريق
منار : ماصدقت قلك روح اتزوج وصرت تدور على عروس دوارة
ماجد : اي والله ياريت عرضتي علي هالشغلة من زمان
منار : وان شاء الله لقيت
ماجد : اي والله لقيت بنت بتقول للقمر روح لاقعد محلك
منار : اي الله يهنيك
ماجد : ويهنيك ياقمر ..
قطعها وقرب من باب غرفتو لحتى يفوت
منار : ماجد
وقف والتفت عليها : نعم
منار : طلقني
ابتسم ورجع لعندا وقال : ليش
منار : هييك
ماجد : لأ لازم يكون في سبب
منار : لأنو .. لأنو
ماجد : لأنو غرتي علي
منار : لا لا وليش لحتى غار اصلا
ماجد : هو بصراحة باينة الغيرة عليكي ورح تاكلك اكل
منار : لا لا انت غلطان
ماجد : اتطلعي بعيوني لشوف
اتطلعت بعيونو بتحدي ..وهو صار يقرب منها وهية ترجع لورا ..لحتى لزقت بالحيط
منار : ليش عم تقرب علي
ماجد : شو نسيتي انك لساتك مرتي
منار : ورح اتطلق
ماجد : مين قال هيك
منار : انا
ماجد. : وانا ماني موافق
منار : خلص مابدك تتزوج انا شوبدي ضل اعمل خلص بروح لعند اهلي وقلتلك اهلك متل اهلي واعز وانا مارح اتركن
ماجد : ومع هيك انا ماني موافق
منار : وليش يعني
ماجد : لانو بحبك
منار صار قلبا يدق بسرعة وداق نفسها
ماجد : شبك ماتردي
منار : ماجد انا .. انا
ماجد : انتي بتحبيني وحاج تكابري
منار : وخطيبتك مابتحبا
ماجد : لا مافي لاخطيبة ولابطيخ لك انا ليش شايف غيرك ..
منار : عم تحكي جد
ماجد : اي جد وجد الجد وكمان مابسترجي
منار : من شو
ماجد : مشان ماتقتليني ههههه
منار : هلأ انا ماكنت مفكرة اقتلك بس والله جبتا لانو انت بدك فركة ادن
ماجد : ولي هي صدقت
اجا ليهرب مسكتو من ادنو
ماجد : يا ويلي
منار : قدامي ع الغرفة لشوف
ماجد : حاضر .. وبامرك انا بس تركيلي ادني
منار : امشي احسن ماطالع كل جناني عليك ها وهو بحركة سريعة فلت منها وحمالا
منار : لك شو عم تعمل تركني
ماجد : انا هلأ بدي طالع جناني عليكي مو انت قال معد بدا اياني قال
منار : ههههن خلص والله معد عيدا نزلني
ماجد : للأسف انحكم عليكي مؤبد بسجن ماجد
منار : وانا رح كون اسيرة عندك لاخر يوم
ماجد : ربي مايحرمني منك
ضمتو وقالت ولا منك يارب
*********النهاية ******
تعليقات
إرسال تعليق