ضحية الحاضر والماضي الجزء السادس

#ضحية_الحاضر_والماضي
#بقلم_مريم_اليوسف

#الجزء_السادس

نزل جمال واية ع بيت اهلا ... وتعرفو على بعض واية وعيلتا كانو كتير مبسوطين بجمال .. لانو مارح يجي عريس احسن منو لاية .. خلص جمال الزيارة وطلع وطلعت معو اية
جمال : بدك شي حبيبتي
اية : لا الله معك
.........................
احمد قاعد بغرفتو ع العتمة وعم يشرب مشروب .. وقاعد مقبال الشباك عم يتفرج على البدر وعيونو حمرا من كتير القهر والشرب
...................
وميس عم تضب تياباوهية عم تبكي
ميس : هي جزاتي لانو جرحت قلوب شباب كتير الله بعتلي مين يجرحلي قلبي .. بس وين بدي روح ... احسن الشي روح ع بيت جدي اهل امي بالضعية .. اصلا الببت فاضي من سنين ومحدا ساكن فيه ... بس كيف بدي عيش .... الله مابينسى حدا
..........................
ومرت الايام وجمال واية حبون عم يكبر كل يوم .. وكل يوم عم يلتقو مع بعض وكل يوم مشاوير جديدة ... واحمد كان يروح ع الشغل بشكل طبيعي .. ميس راحت ع الضيعة بس لسه مابنعرف كيف عايشة
............................
جمال عم يحكي مع اية
جمال : كيفا حبيبتي
اية : زعلانة منك
جمال : ليش يا عمري
اية : لانو اشتقتلك كتير واليوم ماشفتك
جمال : والله حقك علي بس بتعرفي انتي شغل والشركة بياخدو حصة كبيرة من وقتي
اية : الله يعطيك الف عافية
جمال: ويعافي قلبك ... اي صح حبي ..بدي قلك انو اليوم جايين اهلي يتعرفو عليكي ويطلبوكي رسمي
اية : يامية اهلا وسهلا فيك وفيهن بتنورو ... بس قولك رح اعجبون
جمال : اكيد رح تعجبيهن ... ورح يطير عقلون كمان
اية : عم تخجلني ها
جمال : لك ياريتني جنبك وشوف خدودك يلي متل التفاح لما بتخجلي
اية : جمال بكفي
جمال ؛ هههه طيب ماسي سكري .. بحكيكي بعدين
اية : ماشي .. بحبك
جمال: وانا كمان بموت فيكي
سكر جمال وكان الباب عم يندق قال ادخل
فاتت  شهد سلمت عليه وقعدت
شهد : شوو ملاقيتك فرحان مو ع العادة
جمال : اي والله .. كنت عم احكي مع اية
شهد : اي منيح انك اقتنعت انك بتحبا وما بتحب مايا
جمال : شهد  مايا ماتت الله يرحما والله بعتلي مين يعوضني عنها
شهد :جمال صدقني عم احكي مشانك انت مالازم تحب اية لانو شبيه مايا.. لازم تحبا لاية بحد زاتا
جمال : شهد انا حاليا مبسوط ومابدي شي يعكر علي اوك ياحلو ... انا حاسس انو بحبا لاية مو مهم السبب المهم بحبا
شهد :  اي منيح كتير ..بس لنفترض مايا رجعت عاشت  ووقفت مايا واية قدامك مين بتختار
جمال : مايا طبعا
شهد : جمال لاتكذب على حالك انت حبيتا .. بترجع بتقلي مايا
جمال : انا عم قول هيك لانو مايا الها الحصة الاكبر بقلبي
شهد : جمال اذا بدك تكمل مع اية حبا من كل قلبك ولاتفكر بغيرا مشان ماتظلما وماتظلم مشاعرك يعني انت لما عم تقلا بحبك انت عم تكذب عليها .. لانو الحب ما كلمة وبتنقال انا اصلا مستغربة منك كيف عم تقولا بهل السهولة.. وانت عم تقول مابتحبا
جمال : شهد لا تفوتيني بمية حيط انا بحب اية ونقطة انتهى
شهد : ومايا ؟؟
جمال : اي كمان بحبا
شهد : يعني بتحب تنتين
جمال : اي بصير ليش لأ
شهد : هاد مانو حب هاد كذب ... واية بالنسبة لالك بدل ضائع مو حب .. ممكن تكون عم تحبا بس مو لانها اية لانك عم تشوفا مايا ..
جمال : ......
شهد : حكيي صح ماهيك
جمال : اي صح  ... وانا عم اوهم حالي انو اية هية مايا هيك منيح
شهد : بس هيك حرام
جمال : لا ماحرام وكمان اية بنت فقيرة .. ويعني مارح تفرق معا اذا كانت بديلة او لأ
شهد : شو مشاعر الناس عندك لعبة
جمال : ما لعبة ... بس كلشي بتمنو
شهد : مابعرف .. بس انا شفت اية وصح هية فقيرة بس عندا عزة نفس واذا عرفت الحقيقة مستحيل تكمل معك
جمال : مارح تعرف .. واذا عرفت يمكن تعرف بوقت متأخر لانو عرسي قرب ... وانا فورا رح جيب منها ولد
شهد : بس ياجمال
جمال بصوت عالي : شههددد بكفي ... انا هيك مبسوط  ..لاتتدخلي رجاءً
شهد : متل مابدك .. بالاذن
جمال : اقعدي ع وين رايحة
شهد : عندي شغل ضروري سلام
طلعت شهد وفات نجم
جمال : اهلين نجم شو الاخبار
نجم : استاذ لقينا الكمبيوتر يلي طلعت منو معلومات شركة الادوية
جمال : مييين
نجم : اية ..
جمال : شوووووو
.......................
بضيعة ميس
قاعدة بقلب الشباك لانو البيت قديم والشباك بيقدر شخص يقعد فيه .. وعم تتفرج ع الناس الرايحة والجاي .. وعم تفكر بطريقة تصرف على حالا ...فكرت منيح
ميس : جيب كم جاجة وبيع البيض ... لا لا شوبيض  .. طيب شو بدي اشتغل بضيعة متل هاي ولا معي شهادة ولا ضراب السخن ... ياربي شو اعمل
اجت جارة لعندا ودقت ع الشباك مشان ميس تفيق من شرودا .... نقزت واتطلعت ع الجارة
الجارة : ياصلاتك يانبي شو هالجمال يابنتي ... متل ستك الخالق الناطق
ميس : اهلا خالة تفضلي تفضلي لافتحلك الباب
الخالة : يلا جاي
 ........................
جمال : معقول اية .. لا لا
نجم : ليش لأ ... جمال لاتخلي ثقتك الزايدة فيها تعمي على قلبك
جمال: احترم حالك
نجم : حاضر
جمال : بس المعلومات كانت تتسرب قبل اية
نجم : صح .. بس يمكن كان الشخص رح ينكشف مشان هيك دخلو اية بالقصة ... ومابعيدة تكون هية الجاسوسة لانو احمد بكون بعتها قصد لانو بيعرف انك رح تنجذبلا وتوثق فيه
اجمال صفن شوي وقال : اممم فهمت اللعبة كلا  اذا احمد هيك عمل .. والله مارح ارحمو لا الو ولا الها ....
نجم : انا رح ابعت خبر ورا ندى ونعرف شو علاقتا مع اية
جمال : بدي تجيبا لهووون .. وماتحكي معا ولا كلمة
نجم : حاضر
طلع نجم .. وجمال صار يفكر انو معقول احمد
جمال : احمد الكلب ... والله مارح ارحمك وصلت معك تلعب بمشاعري ... معقول اية شريكتو كمان .. اي اكيد بكون اتفق هو واياها مشان تتقرب مني واتعلق فيها .. هههه بس ما حزرتو مو جمال يلي بيلعب بمشاعرو
.......................
ميس : هاي هية كل قصتي بعد مارموني بيت عمي بالميتم وطلعت مالقيت مكان اجي عليه غير بيت ستو وجدو الله يرحمون
الخالة : اي والله ... وشو ناوية تشتغلي
ميس : والله مابعرف المشكلة مامعي غير بكالوريا واخدتا تشحيط .. ومابقدر اتوظف .. وانا بدي اشتغل
الخالة : شو رأيك تطلعي تشتغلي بالارضي
ميس : مافهمت كيف
الخالة : بتصير تطلعي تقطفي خضرا وفواكه وبتاخدي اجارك
ميس : شووو ... مافي غير هالشغلة
الخالة : والله مافي ... اذا بدك رديلي خبر وانا بحكي الشاويش يشغلك معو
ميس : مين هاد الشاويش
الخالة : هاد واحد بيجتمعو عندو العمال وهو بيبعتون ع الشغل وبياخد نسبة من اجارون
ميس : كماان
الخالة : اي والله .. ومافيكي تشتغلي لحالك لانو مابخليكي
ميس : ياربي عأساس هربت من المدينة قلنا عنها غابة طلعت الضعية غابة اكتر منها
الخالة : هههه مالهل الدرجة ... المهم اذا بدك تشتغلي ردي علي خبر
ميس : طيب ماشي يكتر خيرك ... رح فكر
..... .....................
واقفة اية قدام الخزانة ومحتارة .. ايو فستان بدا تلبس لما بدون يجو اهلو لجمال ... اجت اما من وراها وباستا على خدا وقالت واخيرا رح افرح فيكي يا احلا بنت بهل الكون
اية برمت وضمت اما وقالت : الله يخليلي اياكن ولايحرمني منكن ..  بحبك ماما .. بحبك كتييير
ام اية : وانا كمان بحبك يا روح امك ..
اية : عنجد بحسد حالي انو عندي هيك اهل ... بتعرفي ماما .. لو ماكنتو انتو اهلي كنت دورت عليكن وقلتلكن عملوني بنتكن
ام اية نقزت وبعدت بنتا عنا وقالت : من وين جايبة هالحكي
اية : هههههه شبك ماما عم قول لو
ام اية : لا مافي لو انتي بنتي وبنت قلبي فهمتي
اية : اي فهمت بس ليش عصبتي
طلعت ام اية واية رجعت تدور بين الفساتين على فستان ..
........................
جمال قاعد عم يدور على كرسيه .. وفاتت ندى عم تمشي على عكازة وكان لونا مخطوف
جمال : سلامة رجلك تفضلي ارتاحي
قعدت ندى وهية متوترة
جمال : ندى بدي تحكي كلشي بلا لف ولا دوران اية من وين بتعرفيها
ندى : مين اية ... تذكرت بسرعة وقالت .. اي اي اية قرايبتي
جمال : ليش بالاول قلتي مين اية
ندى : لانو ... لأنو
جمال ضرب ع المكتب وقال : لانوووو شوووو
ندى صارت تبكي : بحكي كلشي ... والله هنن هددوني يقتلو اخي انا مادخلني
جمال : هنن مين
ندى : عمران .. مدير اعمالو لاحمد
جمال جلس قعدتو على الكرسي وعطا انتباهو لندى وقال احكيلي كلشي بالتفصيل ومن الاول
ندى: بس بالاول بدي توعدني انك ما تأذيني
جمال : بوعدك .. احكي
حكت ندى كلشي لجمال ... وهو عم يسمع ووجهو احمر من كتر الغضب وعم يضغط على ايدو وناطر ندى لحتى تخلص .. خلصت ندى وقام فورا طلع من المكتب
وراح على حارة اية .. اتصل فيها وقلا تتطلع فورا طلعت اية
اية : كيفك حبيبي
جمال : اركبي
اية : ع وين
جمال : عم قلك اركبي هلأ ع الطريق بتعرفي
اية : هههه طيب اكيد عاملي مفاجئة متل عوايدك
جمال : هه واحلا مفاجئة
طلعت اية وجمال ساق بسرعة...حتى وصل ع شركة احمد
اية غصت وقالت : نحنا شو عم نعمل هون
جمال : ولا شي ... بس عندي شغلة صغيرة .. انزلي
اية : لا خليني هون
جمال نزل من السيارة وراح لعند باب اية فتحو وسحبا من ايدل بقوة..
اية : جمال شبك عم توجعني
مارد عليها وضل يسحبا لنص الشركة وقف بنص الشركة ...والموظفين التمو حوليه .. وصار يصرخ
جمال : احمدددد .... احمددد
طلع احمد وشاف جمال واية وابتسم ابتسامة نصر وقرب منون
احمد : اهلا اهلا نورتو
جمال رما اية بالارض عند رجلين احمد
اية مصدومة من يلي صار
جمال : خود هي زبالتك
احمد : ههههههه
اية مصدومة من الحكي يلي عم يقولوه عليها
جمال : اذا مفكر يا احمد انك غلبتني فأنتي كتير غلطان يعني حاولت تستغلني بشبها لاختك مايا وانك تلعب مشاعري فأنت كتير غلطان
اية لما سمعت هيك معد استوعبت شي .. شبه اختو مايا
احمد : يعني بدك تقنعني انك ما حبيتا وقررت تتزوجا
جمال : ولا بحياتي رح حبا .. انا حبيت اختك مايا وبس اما هية كنت عم اتسلى فيها ما اكتر لانو شبيهة اختك ... فبحب قلك انك ماقدرت علي
نزل جمال لعند اية وقال : وانتي عم تخدعيني هههه قلتي بنقل اخبار لاحمد وبحب جمال وبتزوجو  وهيك بتضربي عصفورين بحجيرن واحد  هههه بس للاسف احمد كمان استغلك بشبه اختو يلي هية حبيبتي وحطك بالشركة مشان انا استغلك ... ههههه ياحرام طلعتي انتي الضحية يعني بطمعك وصلتي حالك لهون   وبدل ما تستغلي الطرفين نحنا استغليناكي  بعدين مين انتي لحتى حبك انتي بدل ضائع بس شفقت عليكي وقررت كمل معك لانك فقيرة ... بس انك تطلعي الجاسوسة هية مابسمحلك فيها وهون اللعبة انتهت
اية عم تبكي : كنت عم تضحك علي
جمال : هز براسو .. اي متل ما انتي فتي ع الشركة مشان تخدعيني هيك بنكون تصافينا
طلع من جيبتو صورة ورفعا قدام اية وقال انا حبيت هية ...ويمكن تقربت منك لانك بتشبهيها ما اكتر وعنجد كنت ناوي كمل معك ... بس للأسف طلعتي خاينة
اية كانت عم تتطلع ع الصورة بصدمة كبيرة ومانا مصدقة لا عيونا ولا الشي يلي عم تسمعو .. وكأنو خرست ماضل عندا شي تحكيه او حتى تدافع عن حالا
احمد حس انو انقهر على اية بس ما حب يبين هالشي قداما وقدام الكل
احمد : جمال المعركة والحرب انا يلي ربحت فيهن مشان هيك حاج تعمل انك مانك متأسر
جمال ضب الصورة بجيبتو وقال  انا هلأ مابدي منك شي وهي زبالتك صارت عندك ... بس قسما بالله اذا بتحاول تقرب مني معد ارحمك
احمد : للاسف كنت حابب كمل بس عطيت وعد للوالد
لف ضهرو جمال وراح واية قاعدة بالارض عم تبكي وصافنة وعم تتذكر كل كلمة قالا جمال واحمد بس في افكار كتير عم تضرب براسا وماعم تقدر تستوعب شو صار
مشي احمد خطوتين بس وقفو صوت اية
اية : احمدد .. ممكن تفهمني شو صار  .. ليش استغلتني .. ما عأساس روح شوف حياتي .. لشو كان بدك توصل ... وجمال يلي قالو صح .. مشان الله فهمني
لف وشافا واقفة وعم تحاول تتماسك
احمد : اية يلي قالو جمال صح .. انا استغليتك لانك شبه اختي يلي هية حبيبتي جمال .. وحطيتك بالشركة لانو بعرف انو رح يتقرب منك
اية : يعني..
احمد : اي انا كذبت عليكي لما قلتلك انو جمال شافك مرة وحبك .. اصلا ولا مرة شافك قبل هلأ
اية : وليش طلعنتي بنظرو خاينة
احمد :  انا كان بدي تطلعي بنظرو خاينة مشان اكسرلو قلبو ... لانو جمال عنجد حبك
اية : بكفي ... بكفي .. حاج تضحكو علي
طلع من جيتو رزمة مصاري وعطاها لاية وقال : انسي كلشي وبلشي من جديد
اخدت المصاري منو ورمتون بالهوا وصارو ينزلو على الموظفين .. نزلت اخدت شنتا وطلعت
صارت تحكي حالا .. ومشاعري يلي عملتوها مسخرة مين بدو يعوضني فيها
...........................
بشركة جمال ..
اجاه اتصال لعمر : اي الو .... شووووو ... هيك صار .. واية شو صار فيها ... العما ما احقرون هدول الجوز ... خلص انا رح احكي كلشي واعترف واطلع من هاللعبة الوسخة ... لانو هي البنت ما زنبا .
قعد عمر ينطر جمال ليرجع ع الشركة بس ما رجع
..........................
ببيت شهد
دق الباب وفتحتلو شهد
فات وهو معصب وعم يحكي : طلعت خاينة .. طلعت جاسوسة لاحمد
شهد : مين ؟؟
جمال : اية ... طلع احمد حاططتا مشان تسرق المعلومات
شهد : انت متأكد
جمال : اي متأكد .. واخدتا ورميتا عندو وقلتو خود زبالتك
شهد : شووو ... هيك عملت
جمال : اي .. لانو احمد قصدو بهل الحركة يتحكم بمشاعري .. بس مافشر
شهد : اييي وانت شو عملت ..
جمال:قلتلو انو انا ماحبيتا ولا رح حبا بعمري وانو انا استخدمتا كشبه ما اكتر
شهد : اية شو حكت
جمال : ليش شوبدا تحكي ما كشفتا ... بس ماعلي هاي الحركات
شهد : بس مزال دخالة جاسوسة ليش لحتى تحبك
جمال : كذابة .. ولا بعمرا حبيتني .. بتكون حبت المصاري مو اكتر
شهد: انا حاسة انو في غلط ...برأيي كان لازم تواجه اية لحالا بالاول
جمال : مابهمني .. خلص اللعبة انتهت وكل هالكوابيس طلعت من حياتي . وانا خلص حبيبتي ماتت وبس
شهد : جمال .. انت حبيتا لاية
جمال : عم قلك للمرة المليون ما حبيتا وكنت عم استغلا
شهد : الفراق هو الدليل وبكرا شوف كيف رح تبكي عليها ... لانك انت حبيتا وقبل ماتقلا هالكلام وتجرحا اتأكد انك جرحت حالك بالاول
جمال ماحكي ..
...........................
دقت اية على بيت رفيقتا لمى .. فتحتلا لمى ضمتا وصارت تبكي
لمى : ايةة؟؟ شبك .. ياقلبي .. فوتي فوتي
فاتت اية لمى وضلت اية حوالي الساعة وهية تبكي من كل قلبا بدون توقف .. ولمى ناطرتا لحتى تخلص
لمى : اية بكفي بكي ... مانشوفو دموعك ... مشان الله خبريني .. ليش عم تبكي ... حدا دايقك .. تركتو انتي وجمال .. طيب شو صار ... مشان الله عقلي عم يروح ع اماكن تانية .. يلله احكي ... انا قايمة جبلك كاسة مي 
قامت جبتلا كاسة مي وشربتا ومسحتلا دموعا وقالتلا بكفي بكي بدي اعرف شو صار
اية وهية عم تتشلهف : كلو كذب .. كلون كذبو علي وخدعوني
لمى:مين هنن احكي
اخدت نفس عميق وحكت : احمد كان عندو اخت اسما مايا ماتت من سنتين
لمى : اييي
اية : هي البنت نسخة طبق الاصل عني .. انا لما شفتا فكرتا انا
لمى : شوووو ... طيب كملي
اية : هي البنت كانت حبيبت جمال ... واحمد حطني بالشركة لاني بشبه حبيبت جمال ومشان جمال يوثق فيني .. وكمان مشان جمال يحبني .. وبالاخير يظهرولو لجمال انو انا خاينة .. وعأساس ينكسر قلب جمال .. بس محدا انكسر قلبو غيري ... لانو جمال قلي انتي زبالة .. وبحياتو ماحبني حب شكلي بس .. وعأساس يكمل معي لاني بشبه حبيبتو ولاني فقيرة ..
بس بعد ما عرف انو انا خاينة قال معد يكمل معي
لمى : لعمااااااا ... ما احقر هالعالم ... بس انتي ما خنتيه صح
اية: اكيد احمد عمل شي قصة مشان انكشف ...يعني انا طلعت الضحية من ورا عداوتون ... انا شو دخلني .. ليش الاغنياء اذا شافو قلب نضيف بوسخوه ... ليش...والله ما اذيت حدا بعمري ...
لمى : طيب وجمال
اية : شبو هاد الحقير ... لو تشوفي كيف كان عم يحكيني ولا كانو بيعرفني .. لو تشوفي كيف رماني عند رجلين احمد وقلو خود زبالتك
لمى : شو ناوية تعملي
اية :  لازم انهي كلشي ... انا تعلمت درس قاسي كتير .. واكيد ما رح اوقع هون لازم اتعلم منيح من هالدرس وبلش من جديد ...
لمى : شو ناوية تعملي مافهمت بدك تنتقمي يعني ؟
اية : هههه شو مفكرتيني مجنونة لخاطر بحياتي وفوت بين هدول التنين .. اكيد لأ  بس رح رجع كلشي لجمال واعطي ورق ارض البيت لاحمد
لمى : ايو بيت ؟
اية : بيتنا ... ما انا من ورا هالورق اتطريت فوت بهل اللعبة  رح رجعلو اياهن ومابدي منيتون بعد اليوم
لمى : وانتو وين بدكن تروحو
اية : رح استأجر بيت صغير وانا رح دور على شغل
لمى : والله مابعرف صح قرار صعب بس هيك احسن
اية : اكيد احسن ... انا قايمة روح ع البيت قومي معي مشان بين اني قوية مابدي بين ضعيفة بيناتون
لمى : اكيد يلا قومي 
.....................
بشركة احمد قاعد وصافن وعم يتذكر منظر اية .. كانت بتحزن
احمد : معقول غلطت بحقا لاية .. خلص يلي راح راح .. خلينا بالحاضر .. قام ووقف ع الشباك واتذكر ميس
احمد : ياترى وين صارت .. معقول رجعت تستغل الشباب .. لازم كل اخبارا تكون عندي
.....................
فاتت اية على بيتا سلمت ع اهلا وقعدت معون .. وهنن لاحظو انو اية بكيانة
ام اية : شبك حبيبتي
اية : ماما تركتنا انا وجمال
الكل انصدم
ام اية شهقت وقالت : لييش
اية : ما وقتو .. ببقى بخبركن ..
قامت وفاتت ع غرفتا هية ولمى ... فتحت الخزانة وصارت تطلع كل التياب وتحطون بكياسون
وشلحت الخاتم رجعتو على علبتو وحطتو بقلب كيس وكتبت على ورقة (انا ماني زبالة انا انضف منكم )
لمى : عنجد بدك تبعتيلو اياها
اية : اي ..
لمى : بركي عصب وعملك شي مشكلة
اية : هههه يعمل يلي بدو اياه مابتفرق معي
لمى : مابعرف
اية : يلا تروحي معي
لمى : خليها لبكرا
اية : لا هلأ
اخدت الكياس وراحت ع بيت جمال .. عطت الغراض للحارس ورجعت
لمى : وبعدين شوبدك تعملي
اية : بدي اعطي ورق الارض لاحمد بس ما اليوم بكرا
............................
ميس ببيتا جدا عم تفكر اذا تشتغل ولا لأ
ميس : ياربي معقول هي اخرتي .... ااااه وينك يا احمد ... خلص لاعد تفكري بحدا لازم بلش من الصفر واسس حالي ..  انا مابستاهلو لاحمد
.......................
اليوم التاني
رن تلفون اية فاقت وعيونا مورمين من كتر البكي .. ردي بصوت خفيف تعبان : الو .. مين
عمر : انا عمر
اية : اهلين عمر .. لاتواخذني ما اتطلعت ع الاسم ..
عمر : كيفك
اية : من الله بخير
عمر : بدي شوفك ضروري
اية : اسفة مابقدر خليها غير مرة
عمر : لا اية لازم شوفك كتير ضروري قابليني بعد ساعة بالكافيه يلي براس الشارع عنكن
اية : طيب ماشي
قامت وهية تعبانة وقفت قدام المراي .. ورجعت تبكي
رفعت اديها يلي عم يرجفو ومسحت دموعا وجمعت شعراتا وربطتون وراحت ع الحمام
بعد ساعة واقفة قدام المراي عم تحاول تخفي الانتفاخ بمساحيق التجميل بس بعدون مبينين .. وطلعت
اية : ماما انا رايحة مشوار شي ساعة
ام اية : ع وين حبيبتي
اية : تعبانة وبدي غير جو
طلعت  وراحت تقابل عمر
........................
فاق جمال كان نايم على الكرسي بغرفتو قام وراسو عم يوجعو
جمال : ليش نايم هون انا ...
صار يتذكر شو صار مبارح وحس في نار شاعلة جواتو بس مابيعرف سببا ... بس كابر على حالو وفات اخد دش ولبس احلا تياب عندو ورش برافان وابتسم ابتسامة غرور ... وهو طالع من الغرفة لمح كياس محطوطين جنب الباب .. قرب فتحون وشاف التياب والخاتم وورقة فتح الورقة  وقرا شو مكتوب وانقهر وحس النار طلعت من راسو .. ونزل فورا
.....................
بالكافيه
ايه : شوفي عمر .. شو هو الضروري
عمر : انا عرفت كلشي صار معك
اية انصمدت : انت شو عرفك
عمر : انا الجاسوس الاصلي يلي بشركة جمال
اية : مافهمت
عمر : انا بالاول كنت اشتغل عند احمد وجيت ع شركة جمال .. المهم انا رفيقي المقرب بعدو عم يشتغل عند احمد
اية : انت ع وين بدك توصل
عمر : احمد طلب مني ابعت معلومات من كمبيوترك .. مشان نتكشفي
اية : بصراحة انا من مبارح عم حاول جمع زاكرتي وما طلع معي شي يارتي تحكي بوضح اكتر
عمر : احمد طلب مني هيك مشان يكشفك جمال وينكسر قلبو ويعرف انو حبيبتو خاينة
اية : اي اي فهمت عليك ... وصار يلي بدو اياه ... انت شو بدك
عمر : انا بدي اعتزرلك لانو انا السبب
اية : ولا يهمك ... هيك هيك بدي انكشف .. وكمان منيح انو انكشفت هالقصة لانو كشفت مشاعر جمال الحقيقة تجاهي
عمر : انا رح صلح الغلط
اية : غلط شو
عمر : رح قول لجمال انو انتي بريئة
اية : لا تقولو مابدي اياه يعرف
عمر : بس ما مشانك بدي قلو مشاني مشان ريح ضميري
اية : يلي بدك اياه عملو معد تفرق معي .. انا اتأخرت سلام
قامت وراحت على بيتا وهية عم تحاول تحبس دموعا لحتى توصل ع البيت
......................
احمد قاعد بمكتبو وحاسس حالو كتير مدايق ومقهور ومخنوق ...
احمد : ياترى صح يلي عملتو مع ميس .. كان لازم اعطيها فرصة .. العما ما اغباني .... بركي طلعت عنجد خاينة ... بس انا مابينضحك علي ... لازم دور عليها وخليها تحت نظري واذا كانت متغيرة رح رجعا
حمل تلفونو ودق : الو .. اي بدي منك تعرفلي كلشي ع الاسم يلي رح اعطيك اياه وتعرفيلي وينا هلأ وكلشي عنا .....
...................
بسيارة جمال عم يحاول يتصل بأية .. وهية ما ترد بعدين بعتلا رسالة ... ردي
قرت الرسالة وما ردت
جمال : هي البنت بدا تجنني يعني
بعتلا رسالة طلعي ع راس الحارة ضروري
قرت الرسالة وقالت : ما فشرت . وما ردت
بعتلا رسالة : طلعي احسن ما اجي اعملك فضيحة
قامت وطلعت
اية : خير استاذ جمال شوفي
جمال : شو قصدك وليه حشرة انك انضف مني
اية : اي انضف منك وبمليون مرة كمان .. يعني بدك تقنعني انك نضيف
جمال : كل الحقارة يلي عملتيها ومفكرة حالك شريفة
اية كانت عم تنجرح من كلامو
جمال : ما بكفي اكتفيت بطردك وما ابتليت فيكي وقتلتك
اية : ليكني قدامك اقتلني
جمال : ....
اية : شو ناطر اقتلني ... ولا مابدك تقتل شبه حبيبت القلب
جمال : لا تجيبي سيرتها على لسانك
اية : ههههه امرك وغيرو ...
جمال : ولا شي .. بس تاني مرة اذا بتقولي انك انضف مني لسانك لقصو
اية : اي انضف منك تعالو قصو
جمال : لك خرسيي
قرب ومسكلا وجها بكفو وعصا عليه وكانت اضافيرو رح تنغرز بوجها
جمال : انتي نضيفة ؟؟ انتي اوسخ من الوساخة بحد زاتا .. كنت ناوي اعملك خلق وبشر بس ما بيلبقلك مكانك هون بالمستنقع
بعدت ايدو عن وجها وقالت وعيونا مدمعين : انا خلق وبشر غصب عنك وعن الاكبر منك .. وهالمستنقع فيه كتير عالم نضيفة من جوا مو متلكن بتستغلو الناس
جمال : هههه ليكو مين عم يحكي عن الاستغلال... ليش ما انتي فتي ع الشركة مشان تستغليني وتسرقي الملعومات لاحمد
اية : اولا انا فتت ع الشركة لانو مجبورة وكان علي دين وكنت عطول حاول اترك الشغل مشان لاقي حجة انو ما قدرت سرب معلومات لانو ما من طباعي الخيانة واكتر من مرة حاولت اترك وانت تمنعني ولا نسيت ؟؟.. وثانيا انتي يلي استغليتني تحت اسم الحب وعملتني لعبة بأيدك غيرتلي اكلي ولبسي وشعري حتى حياتي غيرتا مشان صير مايا تبعتك بس انا اية ورح كون اية وبس .. ولا لانووفقيرة وبحاجة مصاري مشان ساعد عيلتي مشان ما نصفا بالشارع صرت وسخة .. اذا هي اسما وساخة انا قبلانة ومع هيك انا انضف منك لانو انا مستعدة اعمل المستحيل كرمال اهلي .. وكمان انا حبيتك من كل قلبي بس انت خزلتني وجرحتني كتير وحبي ما كان استغلال او طمع فيك او بمنصبك ومصاريك انا حبيت جمال .. بس للاسف جمال طلع واحد....  خليني ساكتة
جمال وهو عم يسمع حكيا حس حالو عم يتقطع من جوا .. معقول اذاها لهل الدرجة
تركتو ومشت ودموعا سابقتا 
جمال اتصل ع شخص : الو .. اي رح اعطيك  عنوان بيت وتعرفلي شو قصتو والناس يلي بقلبو مستأجرين ولا لأ ... اوك .. رح اعملك شير للموقع
ركب السيارة ومشي
اية : فاتت ع غرفتا ورمت حالا ع التخت وصارت تبكي : كلكن كلاب .. كلااااب .. الله يلعنك .. جاي تحاسبني عشان كلمة روح الله بنتقم متك ومن احمد
.........................
ميس بالضيعة عم تعمل قهوة وشاردة
ميس : خلص رح اقبل اشتغل كمان هالشغل فيه رياضة .. وهيك بكسب مالي من عرق جبيني .... هلأ بخبر الجارة تشفلي هاد الشاويش
........................
بشركة جمال قاعد ورا مكتبو عم يتفقد الملفات .. اندق الباب
جمال : ادخل
فات عمر
عمر :استاذ في شي ضروري بدي احكيلك اياه
جمال : تفضل ارتاح
قعد عمر
جمال : ادخل بالموضوع فورا
عمر : استاذ انا هو الجاسوس
جمال : شووو
عمر : اي استاذ انا الجاسوس يلي كنت سرب المعلومات لاحمد .. قبل ما تنفعل خليني كمل للاخير
جمال وهو عم يتمالك اعصابو : خللص
عمر : انا كنت انسخ كل الملفات المهمة ع ورق وابتعتا لاحمد
جمال : مشان هيك ما بين شي لما عملنا فحص للكومبيوترات
عمر : صح .. وانا من فترة كنت رح انكشف
جمال : كيف
عمر : في زميل كشفني وهددني انو بدو يخبرك وانا وعدتو انو معد سرب معلومات وانو هو ما يكشف امري .. وانا خبرت احمد وقلي انو رح يدخل حدا جديد ع الشركة
جمال : قصدك ع اية
عمر : اي صح .. بس اية بعد ما دخلت الشركة اعتزرت من احمد وقالتلو ما بتقدر
جمال : عم تحكي جد
عمر : اي والله جد
جمال : بس اخر معلومة طلعت من كومبيترا .. عندك علم بهل الشي
عمر : بصراحة انا يلي بعتت هي المعلومة احمد طلب مني 
جمال : شووو
عمر : اي اية بريئة .. وكمان خبرت شو عملت فيها بشركة احمد وانا جاي لحتى اعترف وريح ضميري .. وانا جاهز للعقاب يلي بتفرضو علي حتى لو القتل لانو انا خاين وبستاهل الدبح
جمال صفن وصار يفكر انو قديش هو حمار ومستعجل .. يعني اية كانت بريئة وهو بغبائو خسرها للابد .. كان ممكن يسمعا ويعطيها فرصة
ضرب ايدو بكل قوة على الطاولة .. وعمر نقز
فاق جمال من شرودو وشاف عمر قاعد قدامو
جمال : سلم شغلك والله معك مابدي شوف خلقتك مرة تانية
عمر : بس هيك
جمال : اطلاااع لبرا قلتلك
طلع عمر وفرح من جوا لانو جمال اكتفى بس بتطردو
فات نجم وشاف جمال معصب
نجم : جمال انت بخير اذا بدك برجع بوقت تاني
جمال : ليش جيت انت كمان
نجم : مشان الشخص يلي طلبت منو معلومات عن عيلة اية
جمال : شو قال
نجم : قال انو من فترة صارت مشكلة بالبيت واجت البلدية لحتى تهدو لانو الارض يلي عليها البيت طلعت املاك دولة .. وقال تاني يوم دبرو مصاري ودفعو واشترو الارض من الدولة
جمال : اصبح المصاري دفعون احمد
نجم : بدك شي غيرو
جمال : لا طلاع .. وانا كمان طالع
..........................
بشركة احمد
غمران : احمد مافي اي اخبار عن ميس
احمد : كيف يعني
عمران : والله مابعرف ما لقيناها
احمد : ما عندا قرايبين
عمران : لا في بيت عما وبس مابيعرفو عنا شي .. ومن عيلة امها مافي حدا كلون ميتين
احمد : شو يعني انشقت الارض وبلعتا
عمران : مابعرف
احمد : خلص انت روح ..
طلع عمران وقعد احمد صار يفكر : معقول معد شوفك يا ميس .. ياترى وين رحتي ... بس ع القليلة اعرف شو عم تعملي او تشتغلي ... العما ما اغباني شو اني متسرع ... وكمان اية حاسس حالي ظلمتا .. انا فكرت اذا عرضت عليها المصاري بترضا .. معقول انا صرت اناني لهل الدرجة ... رح خليها فترى لحتى تهدا وروح اعتذر منها
 ..................
مرق اسبوع وخلال هالاسبوع كانت اية منعزلة لحالا بغرفتا وطول الوقت عم تبكي وجمال كان يداوم يشغلو بس عطول مدايق ومقهور وخلاقو براس مناخيرو  ..واحمد نفس حال جمال قلبو مكسور وعم يحاول يدور ع ميس وما عم يلاقيها .. وميس بلشت شغل بالارضي الزراعية اول يومين تعبت كتير وجسما عضّل بس يوم عم يوم عم تتعود

يتبع ............