#ضحية_الحاضر_والماضي
#بقلم_مريم_اليوسف
#الجزء_الثاني
بشركة جمال
جمال لسكرتيرة : بعتيلي ورا نجم
اجا نجم لعندو
نجم : خير قال طلبتني
جمال : شو صار معك بموضوع الجاسوس
نجم : استاذ مافي شي جديد اصلا معد تسربت اخبار من الشركة
جمال : عم يلعبوها صح
نجم : هيك الظاهر
جمال : بس ما على طول رح يضلو ساكنين .. انتو خلي عيونك مفتحة منيح كتير
نجم : امرك استاذ .. استاذ اذا اكتشفنا مين الجاسوس شو بدك تعمل فيه
جمال : مين ما كان هاد اسمو خاين وما رح اقبل غير بقتلو
نجم : عم تحكي جد
جمال : اي جد .. شو اول مرة بنقتل حدا .. بس ما منقتل ظلم
نجم : طيب انا بالاذن
........................
اية : استاذ قال طلبتني
احمد : اي اية ممكن تقعدي
قعدت اية وهية متوترة واحمد اجا قعد مقبالا .. بعد شوي بيدخل الآذن ومعو قهوة وبضيفون وبيطلع
احمد : اية انا بدي مساعدتك
اية: اذا بقدر اكيد بساعدك انت فضلك سابق علي وعلى عيلتي بس شو هو الطلب واذا بقدر اعملو او لأ
احمد : بتقدر تعمليه بس خطر شوي
اية : خطر من ايو ناحية
احمد : بدي حطك بمكان تراقبي شخص
اية : طيب مامشكلة انت قلي
اندق الباب وفات عمران
احمد : شو عمران
عمران : ولا يهمك محلولة بس مو هلق بنهاية الدوام
احمد : طيب تفضل اقعد
احمد :اي اية بنرجع لموضوعنا ..
اية : معك استاذ
احمد : في رجال اعمال كبير بدك تروحي تشتغلي عندو
اية : طيب شو بدي اشتغل عندو
اتطلع احمد على عمران
عمران : سكرتيرة
احمد : متل ماقال عمران سكرتيرة
اية/وبعدين
احمد : حتى تصيري هنيك انا بقلك المعلومات يلي بدي اياها وانتي بتجيبها بسرية تامة
اية : بس ليش هيك انت عم تعمل
احمد : لانو هاد الشخص قتل اختي وبدي انتقم منو بتساعديني
اية وهية خايفة وما مقنتعة قالت : اي موافقة ..
احمد : عنجد بدي اتشكرك لانك وافقتي
اية طيب هو رح يعرف انو كنت اشتغل عندك وبركي شك فيني
احمد : شو عمران
عمران : لا خلينا نحكي الصراحة بكون احسن لانو اذا خبينا وسأل بيعرف انو انتي الجاسوسة
اية : جاسوسة !؟
عمران : اي هيك بقولو
اية : طيب المهم ؟
عمران : بتقولي انك اشتغلتي فترة بشركة احمد وبتقولي انو صار معك مشكلة بينك وبين شب وانتي تركتي الشغل
اية : اي ماشي ... بس مين بكون الشب
اتطلعو ببعض بحيرة
عمران : قولي انو عمران كان يحاول يدايقك وانتي تركتي الشغل مشان ماتكبر القصة والفضيحة
اية: وكيف بدي روح قلون انو انا جاية اشتغل
احمد : تركي هالموضوع علينا ونحنا قبل ما نبعتك منقلك شو السبب
اية: طيب ماشي .. انا بدي روح كمل شغلي
احمد : اية سلمي شغلك لحدا وانتي روحي ع البيت بتعتبري حالك بإجازة لحتى نخبرك نحنا
اية : اوك ماشي بالاذن
طلعت وهية خايفة كتير وحست حالا انو غلطت لما وافقت بس ماكان فيها ترفض لانو احمد الو فضل كبير عليها
.........................
عند انتهاء الدوام
عباب شركة جمال .. واقف عمران بسيارتو
طلعت السكرتيرة ووقفت ع الطريق لتوقف تاكسي
قرب عمران بسيارتو وزمرلا
هية اجت لعندو
السكرتيرة : تفضل
عمران : ممكن تركبي في موضوع ضروري ي احكيه معك
السكرتيرة : بخصوص شو
عمران : موضوع ضروري
السكرتيرة : اسفة مابركب مع حدا ما بعرفو
طلع عمران تلفونو وفتحلا على صورة وقال اخوكي حلو وهو طالع من المدرسة. وفرجاها الصورة
السكرتيرة : مين انت
عمران: اطلعي لنحكي وبقلك مين انا
طلعت جنبو وراحو
عمران تروحي نشرب شي
السكرتيرة : مابدي اتزهرم شي قلي شو بدك من الاخير
عمران : انا بكون مدير اعمالو لاحمد
السكرتيرة : خلص فهمت كلشي اذا مفكر بدك تشترني فأنت غلطان ... لو سمحت وقف ع اليمين
عمران : مابدي منك شي
السكرتيرة : لكن شوو
عمران : بدي تعطلي شهر زمان وتقعدي بالبيت
السكرتيرة : لك ماني عم افهمي شي
عمران : انتي بتعطلي وبتقعدي بالبيت وبتاخدي راتب عشر اشهر ونحنا بدنا نحط وحدة مكانك
السكرتيرة : اولا مافي سبب اقعد بالبيت وتانيا انا ماني قبلانة عرضك وثالثا انا مابخون جمال بيك ولو على جثتي
عمران : اولا بنعمل سبب هلأ بكل بساطة بكسرلك ايدك او اجرك وثانيا لاتنسي انو اخوكي مراقب واي اشارة بخطفو وبحرقلكن قلبكن شهر زمان وثالثا انتي ما رح تخونيه لمديرك المصون لانك مريضة ... يلا فكري معك عشر دقايق
عمران : شووو
السكرتيرة : موافقة بس بلا كسر
عمران : طيب هلأ باخدك لعند دكتور صديقي يركبلك جبارة على رجلك بدون كسر
السكرتيرة : وين المبلغ
عمران : هههه قلتيلي مابتخوني مديرك .. ليكي المبلغ بالتابلو
فتحتو واخدت ظرف فيه مصاري حطتو بشنتايا
..............................
لمى : لك انتي مجنونة كيف بتقبلي هيك طلب
اية : افهمي علي ماكان فيني ارفض
لمى : لا فيكي بكرا روحي واعتزري
اية : مابقدر انا وعدتون
لمى : ياربي منك .. انتي بتعرفي كمية المصايب يلي جبتيها لراسك
اية : مشان الله حاج تزيدها علي .. قوليلي مارح يصير شي
لمى : ادعي الله يمرقلك اياها على خير
اية : الله يمرقا على خير .. دخليك يارب والله انا ماخرج تجسس وما تجسس .. بس انا عم ساعدو هو بدو ينتقم لاختو وانا عم اعمل عمل انساني ماهيك
لمى : هههه اي واسي حالك
.........................
ع باب السكرتيرة
عمران : الحمد لله على سلامتك
السكرتيرة : هه الله يسلمك اخي وينو
عمران : بكون ناطرك بالبيت
السكرتيرة : انزل هلأ ولا لسه بدك تقول شي
عمران : اي بدي قول .. خدي هاد رقمي اذا صار شي بتخبريني .. واول ما بتنزلي بتتصلي بجمال وبتقوليلو عملت حادث وكسرت لرجلي وانك رح تبعتي رفيقتك تدوام بدالك
السكرتيرة : ماشي ... الله يستر
عمران : خلص انتي لاتهتمي واذا انكشفت السكرتيرة البديلة نحنا من بعد عنك التهمة وبنخليها تعترف انو نحنا وصلنالا بعد ما تعينت هيك منيح
السكرتيرة : اي منيح
نزلت من السيارة وهو راح
.......................
ببيت جمال طالع من الحمام لافف المنشفة على خصرو واجا وقف قدام المراي
اتصلت السكرتيرة
جمال : اهلا ندى
ندى : استاذ انا عملت حادث وانا راجعة ع البيت وانكسرت رجلي
جمال : له له عسلامة
ندى : الله يسلمك .. انا اتصلت مشان خبرك انو رح اخد اجازة
جمال : طيب ولا يهمك انا بدبر حالي
ندى : استاذ انا رح ابعت رفيقني هية كتير شطورة بتقعد مكاني لبين ماطيب شو رأيك
جمال : اوك مامشكلة
ندى : وهلأ بالاذن
جمال : اذنك معك ومرة تانية سلامتك وانا رح اجي شخصيا زورك
ندى : مابتقصر
جمال : انتبهي على حالك باي
ندى : باي
..................................
تلفون اية عم يرن
اية : اهلين استاذ احمد .... بكرا ... ان شاء الله .. اي خلص رح انطرو براس الحارة .. سلام
سكرت التلفون وقعدت صارت تقول ياربي ياربي شو هالمصيبة
فاتت لعندا اما
اما : شبك حبيبتي
اية : ولا شي ماما الحمام حامي
اما : اي حامي .. يلاقومي ادوشي ع السريع لحتى نتغدى
اية : يلا ..
.............................
تاني يوم واقفة براس الحارة ناطرة عمران ..
بعد شوي بيجي بتركب معو وبتروح
عمران : شبك مو على بعضك
اية : ولا شي بس متوترة شوي انو مكان جديد وهيك
عمران : خلص ولا يهمك من اول ساعة بتتعودي
عمران : وهي وصلنا انزلي
اية : شركة شو هاي
عمران : نفس شركتنا كان جمال واحمد شركا بعدين انفصلو وكل واحد عمل شركة لحالو
اية : وشو اسما الشركة
عمران : شركة الخطيب
اية : امم .. يلا انا نازلة
عمران : بالتوفيق
نزلت اية وراحت ع الشركة وهية عم تمشي رجل لقدام ورجل لورا
الحارس : ع وين يا انسة
اية : انا السكرتيرة الجديدة
الحارس : اي صح تفضلي
فاتت من باب الشركة وماسكة جزدانة بأديها التنتين من كتر مانا خجلانة او خايفة .. والكل صار بتطلع عليها .. مشت خطوتين وسألت صبية
اية : لو سمحتي وين مكتب المدير انا السكرتيرة البديلة
الصبية : اهلا فيكي .. ابو حسن
ابو حسن : خير انسة سارة
سارة : الصبية السكرتيرة الجديدة وديها على مكتبا
ابو حسن : تفضلي معي
راحت معو وهية عم تحاول تتجاهل نظرات الكل عليها .. وصلها للمكتب وراح
راحت قعدت ورا المكتب ومانا عرفانة شو تعمل او من وين تبلش .. مسكت لقت ملفات كتير على الطاولة ... قرتون واحد واحد وعرفت انو لازم المدير يوقع عليهن .. فتحت الكمبيوتر: لقت جدول المواعيد اليوم طبعتون على ورقة وحطتا على جنب
بعد شوي بتسمع حدا جاي وعم يحكو ... بفوت جمال ونجم
جمال : خلص ماني عم استوعب شي عملون انت وجبلي اياهن ع المكتب
اتطلع واتفاجئ بأية وسكت واية وقفت واتفاجئت فيه كمان ماحكت
نجم : شو سكرتيرة جديدة
جمال : اي .. انت روح على شغلك
نجم : خلينا نتعرف عليها
جمال وعيونو عليها : قلت روح على مكتبك
نجم : حاضر . وراح
قرب جمال من اية وقال : صباح الخير
اية : اهلين استاذ صباح النور
جمال : فهمتي الشغل
اية : اي كلو مفهوم وواضح
جمال : طيب اطلبي فنجانين قهوة وجيبي الملفات يلي قدامك والحقيني
اية : حاضر .. بس حدا جاي لعندك
جمال : لا .. جيبيهن من دون اعتراض
اية : خمس دقايق وبكونو عندك
............................
احمد ماشي بسيارتو عم يحكي على التلفون مع عمران
احمد : شو صار معك وصلتا
عمران : اي وصلتا وفهمتا كلشي
احمد : طيب ماشي انا شوي وبوصل ع الشركة
سكر ورما التلفون ع التابلو فجأة شاف وحدة رمت حالا قدام السيارة ..... شحط فرام ونزل بسرعة لعندا
كانت هية واقعة بالارض وعم تبكي
احمد : يا انسة انتي منيحة .. وليش رميتي حالك قدام سيارتي
حاطة اديها على وجها وشعرا نازل ومامبينة ملامحة
وهية عم تبكي قالت : بدي موت وارتاح من هالحياة بدي انتحر
احمد : يعني وبكل هالبلد ما لقيتي غير سيارتي تزتي حالك قداما قومي .. قومي الله يوفقك
رفعت شعرا عن وجها واتطلعت عليه هو شافا وانصدم فيها وبجمالا الفاتن وقفت بطولا الممشوق
وقالت : انا اسفة
(هاي البنت نفسا يلي شافتا اية بالكافيه )
مشت خطوتين
احمد : لحظة شوي
البنت : خير شوفي ... قلتلك انا اسفة
احمد: ممكن كلمتين
البنت وهية عم تمثل انها عم تبكي : شوبدك
احمد : ممكن نحكي
البنت :شوبدك
احمد : ليش بنت متلك وبجمالك بدا تنتحر
البنت : هه شو نفع اذا انا حلوة والدنيا كلا بشعة
احمد : طيب تعالي معي لنروح ع شي مكان نشرب شي وبنحكي بركي بقدر ساعدك
البنت : لا مابركب مع حدا انا مابوثق بحدا بركي بدك تخطفني
احمد : طيب بنروح وبتاكسي وع مكان عام وبوعدك انو ما دايقك نهائيا
البنت : طيب ماشي
احمد : لحظة لصف السيارة وراجع .. بس ماقلتيلي شو اسمك
البنت : ميس
احمد : حلو متل صاحبتو
راح يصف السيارة وهية مسحت دموعا وابتسمت ابتسامة انتصار
........................
فاتت اية مع القهوة
جمال : حطي القهوة واقعدي
حطت القهوة وقعدت وهية مستغربة
هو سكر الملف يلي قدامو وقام قعد قداما ع الكنبة
جمال : امم .. اي كيفك
اية : الحمد لله بخير
جمال : ليش رفضتي دعوتي ع القهوة من نهارين
اية : انا بعتذر بس مابقبل شي من حدا مابعرفو
جمال : ما عأساس قلتي بتعرفيني انهار يلي ضربتك بالسيارة وقلتي اني اشهر من نار على علن
اية :ااه .. اي انا بعرفك بشخصيتك وبأسمك بس مابعرفك منيح يعني بركي كنت شخص مانك منيح
جمال : فيها وجهة نظر ... اي كيفا رجلك
اية : منيحة مافيها شي
جمال: منيح كتير .. انتي ليش جيتي بدال ندى
اية: انا رفيقتا وهية قالتلي روحي داومي مكاني
جمال : قصدي انتي كنتي قاعدة بلا شغل
اية : اي
جمال : ماعطيتك كرتي ليش ما اتصلتي كنت دبرتلك شغل
اية : بصراحة خفت
جمال : ااه صح مابتعرفيني .. انتي شو دارسة
اية : هندسة اتصالات بس حاليا موقفة الدراسة
جمال : ليش
اية : بصراحة اهلي معد قدرو يصرفو علي انا قلت بدرس شي سنتين وبعدين برجع بكمل دراسة
جمال : يعني كنتي عم تشتغلي
اية : اي
جمال: ووين اشتغلتي
اية : اشتغلت اول شي بمطعم فلافل بعدين بكافيه .. بعدين بأستراحة بعدين صاحب الاستراحة تواصتلي عند احمد الاحمد واشتغلت عندو
جمال : كنتي تشتغلي بشركة احمد
اية : اي ..حضرتك بتعرفو
جمال : اي بعرفو .. بس شو كنتي تشتغلي
اية : شغلة بسيطة ادخال بيانات ع الكومبيتر بس هيك
جمال : وليش تركتي الشغل
اية : بصراحة مدير اعمالو حاول يدايقني فأنا قلت بنسحب احسن ما جيب لحالي وجع راس
جمال : اممم .. واحمد كيف كانت معاملتو معك
اية : كان كتير محترم ومنيح. . وكان يقلي على طول انتي متل اختي الصغيرة .. يمكن متعاطف معي مشان وضعي
جمال بقلبو لا لانك عنجد متل اختو
جمال : وما سألك ليش بدك تتركي الشغل
اية : مبلا .. ماحبيت قلو عن مدير اعمالو لانو يمكن مايصدقني وانا ماصرلي غير كم شهر بشتغل عندن .. قلتلو بدي ارجع كمل دراسة .. وهو عطاني تعويض عنجد يكتر خيرو
جمال : تفضلي شربي قهوتك
حملت الفنجان بكل خجل وقربتو من شفافها وهوعم يتأمل هاي التفاصيل الدقيقة .. رشفت منو ورجعتو على مكانو .. هو عم يتأمل شفافها الورديات وقال بقلبو حتى نفس الشفاف ونفس الابتسامة
كان شارد فيها تماما ...هية اتطلعت على حالا فكرت فيها شي غلط
اية : استاذ في شي
جمال : اااه لا مافي شي فيكي تروحي
قام من قداما مشان ماتفضحو عيونو
اية : وعشان الملفات
جمال : تركيهن انا بشوفن ولاتقبلي مواعيد اليوم
اية : اوك
جمال : لحظة .. شو كان اسمك
اية : ايه
جمال : حلو اسمك ونورتي الشركة
اية ؛ شكرا استاذ
طلعت وهية مستغربة انو ليش هيك كان عم يتطلع عليها
جمال : جمال لك شو صرلك ليش هيك كنت تتطلع عليها .. شو جنيت هاي مانها مايا .. بس كتير بتشبها .. كتيررر مو شوي ..كأنو عم شوف مايا واقفة قدامي .. شو بدي اعمل ... معقول حبا .. لا لا انا بحبا مايا وبس وهاي شبيهتا مو اكتر يعني مستحيل حبا .. بس اكيد رح حب شكلا لانو بذكرني بحبي .. بس هية بنت فقيرة وبحاجة مساعدة .. خلص رح خليها تشتغل هون بالشركة المهم خليها قدام عيوني وملي نظري منها ... بس هالشي صح .. اي صح
هو حس هالشي صح لانو حس بهدوء وسكينة بقلبو بعد النار يلي كانت شاعلة من شوقو وعشقو لمايا ووجود اية رح يهديه
.........................
بكافيه
احمد ؛ لو سمحت فنجانين قهوة ... اي قوليلي يا ميس شو قصتك وليش بدك تنتحري
ميس : انت قلي شوبدك مني وليش جبتني لهون
احمد : انا حابب ساعدك
ميس : بشو بدك تساعدني كمان مافي حدا بساعد بدون مقابل
احمد : بس ماكلون متل بعض
ميس : بدك تقنعني انك غير
احمد : لا انتي بتكتشفي هالشي لحالك
ميس : مابعرف خايفة
احمد : مافي داعي تخافي من شي .. احكي
ميس : انا قصتي انو وحيدة لاهلي وماتو وانا صغيرة .. رحت ربيت عند بيت عمي قام ماحملوني وحطوني بميتم وربيت بالميتم لكبرت وماطلعت فالحة بشي لا بالدراسة ولا بغيرو. . كنت مستأجرة غرفة ومامعي ادفع اجارها ... وصاحبة البيت قررت تطردني اليوم اذا ما دبرت مصاري .. وكل مابقرب مني شب بصير بدو يستغلني .. ومافي حدا طلع معي صادق شي بقوليلي انو انا حلوة واكيد ماني مخلاي شب وشي بلاقو حجة انو انا ترباية ملاجئ وما خرج كون مرتو والله تعبت كل الدني مسكرة بوجهي واليوم كملتا معي صاحبت البيت قلت احسن الشي ارمي حالي قدام شي سيارة والباقي بتعرفو
احمد : بس الدنيا ماوقفت هون
ميس : انا بالنسبة الي واقفة من زمان
اجت القهوة وصارو يشربو
ميس : وهاي سمعت قصتي بشو بدك تساعدني
احمد : انتي مامعك شهادات نهائيا
ميس : معي بكالوريا اخدتا تشحيط
احمد : بتعرفي كومبيوتر وانكليزي
ميس : انكليزي بلطش تلطيش وكومبيوتر بعرف افتحو وسكرو
احمد : هههه كتير منيح اذا بتعرفي تفتحيه وتسكريه هههه
ميس : عم تتمسخر
احمد : هيك شي هههه
ميس : بالاذن
احمد : شبك ولوو عم نمزح اقعدي
ميس : شو لسه بدك مني
احمد : بدي دبرلك شغل شو رأيك
ميس : شغل الي انا
احمد :اي الك
ميس : بدك تشغلني خادمة عندك
احمد : لا بالشركة
ميس تفاجئت : عم تحكي جد
احمد : والله جد انا عندي شركة ورح وظفك فيها كمان رح استأجرلك شقة صغيرة على قدك شو رأيك
ميس : وشو المقابل
احمد : ياربي لسه كل شوي بتقلي شو المقابل .. والله مابدي منك شي لوجه الله
ميس بقلبا : هه صدقتك كلكن كذابين ومابتعرفو الله
احمد : شو وين رحتي
ميس : خايفة غلبك معي
احمد : اي بدك تغلبني وكتير كمان .. انا قايم
ميس : لحظة اسفة
احمد : شو قلتي
ميس : موافقة .. بس كلو دين
احمد : متل مابدك قومي هلأ
ميس : ع وين
احمد : ع الشركة اولا انا اتأخرت وثانيا بعرفك على مدرب يعملك الشغلات الاساسية على الكومبيوتر ... لانو في عندي موظفة بأجازة بتقعدي مكانا
ميس : معقول اقدر
احمد : اي معقول المهم وثقي بحالك يلا قومي
دفع الحساب وقامو
قامت معو وهية عم تحكي حالا : معقول عم يحكي هاد جد .. يعني انا رح اشتغل واعتمد على حالي .. بحياتو محدا عرض علي هيك عرض كلون كانو يصرفو علي ... بس منيح انا بتعلم .. بس والله شكلي وقعت على حدا محرز هالمرة .. اكيد اليوم صايرمنيح حظي ..معقول يا امي عم تعديلي ههه الله يرحمك
احمد : لك وين بتشردي تعالي وقفت تاكسي
.........................
بمكتب جمال
نجم لاية : استاذ جمال عندو حدا
اية : لا تفضل
نجم : صح ما تعرفنا شو اسمك
اية : انا اية
نجم : وانا نجم .. راجعلك بس لشوف جمال شو بدو
اية : هههه اوكي
فات نجم لعند جمال
جمال : ليش اتأخرت
نجم : كنت مشغول بشغلة
جمال : خود هاد الملف وراجع الشركة يلي باعتو وخليهن يوضحو المطلوب
نجم : اوك وغيرو
جمال : بس
نجم : تعرفت ع السكرتيرة الجديدة
جمال : مين يلي تعرف
نجم : عم اسألك تعرفت عليها
جمال : اي وكانت تشتغل بشركة احمد كمان
نجم : عنجد
جمال : اي
نجم : بس ماتكون جاسوسة
جمال : لا مابظن
نجم : وليش عندك هالثقة الزايدة
جمال : هيك قلبي حسني
نجم : والله ياجمال انت قلبك ما بيكذب ..
راح لورا جمال كان قاعد على كرسيه وبرملو الكرسي لعندو وقلو : بس لازم ناخد اتحتياطتنا ماهيك
جمال : قلتلك البنت مستحيل تكون جاسوسة وبعدين المعلومات عم تتسرب قبل ماتجي
نجم : متل مابدك .. عطيني الملف
جمال : ليكو خدو وروح
اتطلع على الطاولة وشاف صورة جمال مع مايا
نجم : جمال
جمال : شبك
نجم : لك هاي بتشبه خطيبتك
جمال : بعرف
نجم : امممم .. وانا عم قول شاف هالبنت قبل هالمرة
جمال مسك الصورة وقال : معقول في هيك شبه
نجم : عنجد شبه فظيع .. بس ما يكون متل المسلسلات التركية تكون اختا واهلا فقدوها وهية صغيرة
جمال : ههههه شو خيالك واسع .. انا ربيان مع احمد ومايا وماحكو ولا مرة انو اجتون اخت او ماتت او اجا لمايا اخت توأم
نجم : وبركي حدا خطفا بالمشفى
جمال : هههه شو انت متفرج على شي فيلم مكسيكي قبل ماتجي .. مايا لما خلقت كان في ع دورا ايكو وكانو خبرو اذا في توأم او لأ .. وكمان هلأ شفت السيفي تبع اية وعمرا ٢٣ ومايا عمرا ٢٤ الله يرحما
نجم : امين الله يرحما ... واية بدك تخليها بالشركة بعد ما ترجع ندى ع الشغل ..
جمال : مابعرف بس ع الاغلب اي لانو هية فقيرة وبحاجة شغل
نجم : ياخوفي تكون بدك تخليها مشان شي تاني
جمال : لا اتطمن وهلأ روح خلصني
اخد الملف وطلع
نجم لاية : مشغول كتير كنت حابب اقعد وندردش مع بعض.. بس غير مرة
اية هزت براسا وهية مستغربة
..............................
خلص الدوام ..
وميس كانت متعلمة اول درس
اجا لعندا احمد ع المكتب
احمد : يعطيكي العافية
ميس : ويعافيك
احمد : شو صار معك
ميس بصراحة راسي كتير مشوش وحاسة حالي ماعم استوعب
احمد : عادي ..معك معك بتتعودي .. وهلأ جيبي غراضك وتعي معي
ميس : ع وين
احمد : خلص الدوام شو ناوية تضلي هون
ميس : ااااه .. يلا
جابت غراضا وطلعو
احمد : ناخد تاكسي ولا بالسيارة
ميس : لا تعذب حالك انا بروح لحالي
احمد : لك ما عأساس مقلعة من البيت قومي معي
ميس : اااه اي صح .. بس ع وين لا تقلي ع البيت
احمد : ههههه اي ع البيت بس مو بيتي بيتك
ميس : مافهمت
احمد : لك امشي خلصينا
راحو ركبو بالسيارة وراحو .. ووقفو قدام بناي
ميس : وين نحنا
احمد : انزلي
ميس مترددة
احمد : هاي البناي مليانة سكان انزلي واطمنييي مارح قرب عليكي
نزلت واتطلعت على البناي مبينة فيها عالم من الغسيل المنشور على البرندات وفي اصوات ضجة
راحت معو طلعو ع الطابق التاني وفتح الباب
وعطاها المفتاح وقال : هاد مفتاح بيتك وجبتلك غدا جاهز جوا وغراضك انتي روحي جيبهن لانو انا عنجد ماعندي وقت
ميس : واقفة ومصدومة
احمد : اااه لاتنسي تسكري الباب منيح على حالك يلا سلام
تركها وراح وهية فاتت مصدومة سكرت الباب وصارت تمشي خطوات بطيئة ..
ميس : معقول هاد غير .. معقول انا اخترت الشخص الغلط والله كتير منيح مابدي ائذيه ... شبك ميس هنن كلون حقراء وببينون انو اوادم بالاول بعدين ببينوا على حقيقتون بيتمسكنو ليتمكنو .... اي وكمان شو رح اعملو ..... لما اسحب منو شوية مصاري رح اتركو متلو متل غيرو
............................
عم يندق الباب عند اية
فتحت امها وكانت لمى وسمير
لمى : خاله هون اية
ام اية : اي هون تفضلو
بعد ما فاتو
لمى : سمير خليك هون انا رح شوفا
فاتت لمى وطلعت هية واية من الغرفة
اية : قومو ع السطح
ع السطح
اية : كيفك سيمو
سمير : مشتقلك انتي كيفك
اية : انت بتعرف بالشغل
سمير : اي صح بالشغل يلي عم تلعبي فيه بعداد عمرك
اية : لمى قلتيلو ؟؟
سمير : اي قالتلي .. لك ليش عم تخاطري بحالك
(سمير شب نحيل طولو متوسط بيلبس نظارت طبية وبيهوا التكنولوجيا وبضل يخترع برامج وكمان هكر )
اية : يعني طلب مني وماقدرت قلو لأ الزلمة الو فضل علي
سمير ؛ كنتي اعتذري
اية : مافيني اليوم بلشت شغل بالشركة التانية
سمير : اممم رح نلاقي حل نخلصك من هالشغلة
اية : ان شاء الله ... صح لمى عرفتي مين بكون صاحب الشركة يلي رحت عليها اليوم
لمى : مين ؟
اية 'هاد يلي خبطني بسيارتو وكمان يلي عزمنا ع القهوة
لمى : عنجد
اية : اي والله .... بس مابعرف حاسستو غريب بالتعامل معي
لمى : كيف
اية : هو مبين شخص شلون بدي قولا راكز الو هيبة معبي مركزو ومابيحكي مع مين ماكان بس معي كتير لطيف
لمى : لك انتي عندك وجه طفولي والكل بيتعاطف معك
اية :هههه لا وليه مو هيك .. بس عنجد عم يتطلع علي نظرات غريبة
لمى :متل احمد
اية : لا احمد مبين انو كان متعاطف معي بس هاد لأ .. حتى انعجبت فيه وبشخصيتو العصبية والحنونة
لمى : عم تحكي جد
اية : اااه لو تشوفيه رجال بكل معنى الكلمة بيحكي بكل ركازة ... صح هو ما هداك الجمال انو شب عادي بس فارض حالو وشخصيتو وين ما راح والكل بهابو وبيحتروم هاد هو الشب يلي بتتمناه كل بنت
لمى : ياسلام ياسلام
اية: انتي بس شوفيه بتفهمي منيح عن شو عم احكي .. عندو كريزما خاصة
سمير : خلصينا يا ام كريزمة وقوليلنا شو مفكرة تعملي
اية : مابعرف بس كتير خايفة ياريت اقدر انسحب
سمير : عندي فكرة
اية شو هية
صار تلفونا يرن
اية: هاد احمد بيك ... الو اهلا استاذ احمد ... اي كلو تمام ومرق اليوم عادي ... طيب ماشي. . اوك
سمير: شو قلك
اية : قال هالفترة مامطلوب مني شي بس كم يوم لحتى بأمنو وبصير جبلو المعلومات يلي بدو اياها .. الله يخليكن خلصوني
لمى : سمير شو كنت بدك تقول
سمير : نخليها تنطرد من الشركة
اية : اي والله فكرة بس كيف
سمير : عملي شي مصيبة خليهن يطردوكي
اية : والله انا ماخرج مشاكل
سمير : لكن بتروحي لعند مدير الجديد وبتقوليلو انو ما عرفتي تشتغلي وبتفضلي تنسحبي لانو مانك قد هاد الحمل
اية : لك يسلملي هالمخ
سمير : مشان تعرفي انا هاد مابشغلو ع الفاضي
اية : اي شو تشربو
........................
بالمقبرة
قاعد جمال عند قبر مايا وعم يحكي معا
جمال : مايا حبيبتي عم تسمعيني ... اليوم اجت لعندي وحدة ع الشركة بنت فقيرة كتير بتشبهك حسيتك انتي يلي قدامي وبصراحة ارتحت لوجودا وكأنك انتي معي ... معقول الله بعتلي اياها مشان تعوضني عن غيابك ... بس لا مافي شي بعوضني عنك ياعمري ويا روحي ... اشتقتلك كتير ميوشتي .. ااااه .. ولا اخوكي يلي ما تاركني بحالي وماعم يصدق انو ما انا يلي قتلتك ... لك انتي روحي حدا بيقتل روحو
صوت من وراه مرحبا جمال
وقف وكانت اما لمايا
جمال : اهلا خالتي كيفك
ام احمد : الله يرضى عليك يا ابني
جمال : الله يخليكي فوق راسنا
ام احمد : شو شايفتك هون
جمال : اي والله .. كل مابتدايق مابلاقي غير هالمكان يلي بريجني يمكن لانو بشم ريحتا او بحسا قريبة
ام احمد : حبيبي جمال انت لازم ما توقف حياتك هون انت شب وبأول عمرك روح وعيش حياتك لاتربط حالك بشي مات
جمال : بدك اياني انسى مايا
ام احمد : ما تنساها بس تجاوزا .. لازم نفرح فيك وبولادك
جمال : من وين بدو يجي الفرح وانا روحي صارت تحت التراب
ام احمد : صدقني رح تتجاوزا ..ورح تجي وحدة تخليك تنساها
جمال : مستحيل
ام احمد : لا مافي شي مستحيل .. والايام بتكشفلك .. رب العالمين سمانا انسان لأنو بننسى
جمال : مابعرف .. انا بالاذن
ام احمد : اذنك معك ... لحظة جمال
جمال : اي خالتي
ام احمد : لاتوخذو لاحمد رح يجي يوم ويعرف انك مظلوم
جمال : ان شاء الله
لبس نظاراتو ومشي
قعدت جنب قبر بنتا وصارت تبكي
........................
تاني يوم بشركة جمال
فات جمال صبح على اية مع ابتسامة .. واية ردت عليه الصباح كمان بادلتو نفس الابتسامة ..
وبعد شوي لحقتو وفاتت وراه
اية : استاذ بدي احكي شي
جمال : شوفي
اية : انا بدي اترك الشغل
جمال حس انو انقهر واتطلع فيها وقال : ليش شوفي
اية : لا مافي شي بس انا هالشغل ليقتو صعب علي
وانت بدك وحدة تكون مريحة ما بدكن وحدة تعلموها .. انا برأيي انسحب بكون افضل
جمال : بس هيك ولا حدا عم يزعجك
اية : لا مافي حدا عم يزعجني اصلا محدا لحق يعرفني
جمال : طلبك مرفوض
اية بصدمة : ليش
جمال : هيك انا قلت مرفوض
اية : بس انا معد بدي
جمال : وانا بدي والشغل مافي تتركيه وبتعتبري حالك صرتي سكرتيرتي الخاصة وحتى بعد ما ترجع ندى من الشغل مافي تتركي
اية : شو يعني هاد امر
جمال : اي امر .. واذا الشغل ماعم تفهمي عليه انا بساعدك
اية : انت ؟؟
جمال : اي انا .. تفضلي قدامي
اية : استاذا نا بدبر حالي مافي داعي
جمال :تقضلي قدامي
اية :شو هالمصيبة هي
طلعت هية واياه على مكتبا
جمال : تفضلي اقعدي
قعدت ورا مكتبا وهو وقف وراها
جمال : هدول الملفات بيجو لعندك انتي بس شغلتلك تفوتيهن لعندي والمواعيد انا بعطيكي الاوقات الفاضية عندي كل يوم وبتعملي المواعيد على هاد الاساس والفاكس والبريد بتجي رسالة عليهن بتفوتيها فورا لعندي بدك اسهل من هيك
اية : لا
جمال: لكن يلا لا تتكاسلي وشوفي شغلك .. اوك ياحلوة
تركها وفات
اية : لحالا يا حلوة .. ياربي لك انا خايفة اتعلق فيه وبكلامو الحلو ونظرواتو وبالاخير يطلع مانو معبرني .. خلص قدري مبين انو رح كمل بهل اللعبة واكيد نهايتي هون .. اوف .. اوف
حملت تلفونا ودقت للمى : الو اي .. تضربو انتو وهالخطة ... مابعرف ... شكلو اذا رح دمر الشركة مارح يخليني اترك ... ما انا هاد يلي محيرني انو ليش
اي روحي سلام
....................
بمكتب احمد راح لعند ميس
احمد : كيفا الموظفة الجديدة
ميس : اهلين استاذ كيفك انت
احمد : اذا انتي منيحة انا كتير منيح
ميس : شكرا هاد من لطفك
احمد : قوليلي عجبك البيت
ميس : حلو كتير
احمد : فرحت انو عجبك .. جهزي حالك بعد الدوام عازمك ع الغدا ومابدي اعتراض
ميس : حاضر
......................
اية قاعدة وملتهيةبالملفات يلي قداما فاتت لعندا صبية
الصبية : مرحبا
اية : اهلا بدك تفوتي لعند المدير
الصبية : لا .. انا جاي لعندك انا قمر وانتي
اية : انا اية
قمر : تشرفت فيكي .. بصراحة نحنا حابين نتعرف عليكي .. وعازمينك ع الفطور بالبريك
اية : ايو بريك
قمر : هو في بريك للموظفين ربع ساعة بنفطر فيه .. صح انتي ليش ما نزلتي مبارح
اية : مابعرف
قمر : لكن انا شوي وبجي باخدك
اية : والمدير
قمر : اكيد مارح يحكي وندى كانت عطول تنزل معنا ع البريك اصلا هو خصصلنا اياه
اية : اوك .. بجي
.................
ببريك الفطور
قمر : صبايا شباب جبتلكن اية لتتعرفو عليها
الكل : اهلا اية نورتي الشركة .. تعالي الفطور جاهز
قربو منها وصارو يعرفوها عن حالون : انا جاد .. انا محمد ...انا سيلين ...انا عامر ... انا بيان ... انا عمر .. انا لينا ... انا ناهد ......
اية : تشرفت فيكن كلكن
قمر : يلا خلينا نفطر هلأ بيخلص البريك
قعدو كلون وبلشو يفطرو وصارو يلطفو جو مع اية
......................
طلع جمال من مكتبو بعد محاولات انو يحكي مع اية وما ترد.. ولقى المكتب فاضي نزل ع البوفيه شافها قاعدة وحوليها صبايا والشباب وعم تضحك .. وهو انقهر الكتير وحس النار شعلت بقلبو ويلي ذاد غيرتو انها كانت قاعدة جنب عمر وكانت قريبة منو كتير
جمال بصوت عالي : اااية
وقفو الكل ونزلو روسن واية انحلت رجليها من الرعبة وقفت وراسا بالارض
اية :خير استاذ
جمال : خيير ومن وين بدو يجي الخير .. صرلي ساعة عد دور عليكي بالشركة وانتي هون على ضحك وصهصلة
قمر : استاذ نحنا ببريك الغدا
جمال : انسة قمر ماطلبت منك تبرير ..وانتي اية قدامي ع المكتب
مشت اية وهية حابسة الدمعة لانو بحياتا محدا عيط عليها طلعت وراحت
جمال: كملو فطوركن
سيلين : ليش هيك الاستاذ جمال والله البنت ما غلطت
محمد : شكلو معصب
بيان : شكلو ماعاجبو شغلا
لينا : بس مامعو حق يعيط عليها هيك يعني احرجها كتير
عمر : انا بقول ما رح تطول
..................
فاتت اية وقعدت ورا مكتبا
جمال : اذا طلبت شي بتردي فورا فهمتي
اية : حاضر
تركها وفات
وهية صارت تبكي
جمال : لك ليش هيك عملت ليش .. اووف ليش حسيت انو غرت عليها ... اكيد لانو تخيلتا مايا .. بس ياجمال هي مانها مايا هي اية اوووف ... سمع صوتا عم تبكي فتح الباب ... وهية بسرعة صارت تمسح عيونا
جمال : عم تبكي
اية : لا مافي شي
جمال : لحقيني على مكتبي
اية : حاضر
مسحت دموعا منيح وقامت وراه
كان واقف بنص الغرفة
جمال : سكري الباب
سكرت الباب وضلت واقفة مكانا
جمال: تعالي وقفي هون
قربت ووقت قدامو
جمال : ارفعي راسك واتطلعي فيني
رفعت راسا واتطلعت فيه
وهو لما شاف عيونا حمر والدمعة مغرغرة فيهن .. مد ايدو وحطا على خدا ومسحلا دموعا بأبهامو. . هية كانت صافنة فيه وبتصرفو
جمال : عيونك حلوين ومابيلبقلون الزعل
اية : ....
جمال : انا اسف
اية منصدمة
جمال : رح اعزمك ع الغدا مشان اعتذر ع الاحراج يلي سببتلك اياه
رجعت خطوتين لورا مشان تبعد ايدو عن خدا وقالت : لا استاذ مافي داعي انا غلطت
جمال : يعني مارح تقبلي عزيمتي
اية : بعتذر بس مين انا لحتى اقعد مع حضرتك على نفس الطاولة
جمال : اية لاتحكي هيك
اية : انا بستأذن بدي ارجع ع مكتبي
جمال : انتي اليوم اجازة فيكي تروحي ترتاحي واسف مرة تانية
اية : استاذ لاتعتذر .. الشخص يلي متلك مابيعتذر وانا كمان غلطت
جمال : اسف لانو بكيت هالعيون الحلوة
اية : شكرا ع المجاملة
جمال : بس انا ماني عم جاملك انا..
اية : انت شو
جمال : خلص روحي
اية : بالاذن
طلعت بسرعة حملت شنتايتا وراحت بوجها لعند احمد
يتبع .........
يااااسلام حبابة ماتتاخري
ردحذفعم تشوووقيني بزياادة ❤❤لااطولي فيااا كتيرر حبابة
ردحذف